Xisbiga Caddaaladda iyo Wadajirka oo xarun cusub ka furtay Gaalkacyo

Gaalkacyo (Dawan) – Xisbiga Caddaaladda iyo Wadajirka (JSP) ayaa xarun cusub ka furtay magaalada Gaalkacyo ee xarunta gobolka Mudug, iyadoo xaruntan ay noqonayso tii sagaalaad ee xisbigu ku yeesho dowlad-goboleedka Galmudug.

Munaasabadda furitaanka xarunta ayaa waxaa ka qeybgalay mas’uuliyiin ka tirsan hoggaanka sare ee xisbiga, xildhibaanno ka tirsan labada Aqal ee Baarlamaanka Federaalka Soomaaliya, wasiirro, senatarro iyo mas’uuliyiin ka socday maamulka gobolka Mudug iyo degmada Gaalkacyo.

Wafdiga xisbiga waxaa hoggaaminayay Yuusuf Maxamed Jimcaale (Madaale), oo xarigga ka jaray xarunta cusub, isla markaana hambalyo u diray maamulka, wakiillada iyo taageerayaasha xisbiga ee magaalada Gaalkacyo.

Yuusuf Madaale ayaa sheegay in furitaanka xaruntu uu qeyb ka yahay qorshaha xisbiga ee lagu ballaarinayo howlaha siyaasadeed iyo xoojinta xiriirka uu la leeyahay bulshada ku nool Gaalkacyo iyo deegaannada kale ee gobolka Mudug.

“Farxad weyn ayay noo tahay inaan maanta xarigga ka jarno xarunta Xisbiga Caddaaladda iyo Wadajirka ee degmada Gaalkacyo. Waa xaruntii labaad ee xisbigu ku yeesho guud ahaan Galmudug,” ayuu yiri Madaale.

Xisbiga Caddaaladda iyo Wadajirka ayaa hore xarumo uga furay Dhuusamareeb oo ay ku taallo xarunta dhexe ee xisbiga ee Galmudug, Cadaado, Xeraale, Balanbal iyo Cabudwaaq oo uu ku leeyahay saddex xarumood, halka xarunta cusub ee Gaalkacyo ay sii xoojinayso joogitaankiisa siyaasadeed ee gobolka.

Furitaanka xaruntan ayaa qeyb ka ah dadaallada JSP uu ku ballaarinayo abaabulka taageerayaashiisa iyo ka qeybgalka geeddi-socodka doorashooyinka dalka.