Xujeydi ugu horreysay ee Soomaaliyeed oo gaartay Madiina

Madiina (Dawan)- Qeybtii ugu horreysay ee xujey Soomaaliyeed ah ayaa gaartay magaalada Madiina ee dalka Sacuudi Carabiya, taasoo calaamad u ah bilowga xilliga Xajka 2026 ee Soomaaliya. Waxaa sanadkan la filayaa inay safraan in ka badan 11,000 oo xujey ah, sida ay sheegeen masuuliyiinta Soomaaliya.

Kooxdan oo ka amba baxday magaalooyinka Hargeysa iyo Muqdisho ayaa Jimcihii ka degtay Garoonka Caalamiga ah ee Amiir Maxamed bin Cabdulcasiis, halkaas oo ay ku soo dhaweeyeen safiirka Soomaaliya ee Sacuudi Carabiya, Maxamed Amiin Sheekh Cusmaan, iyo madaxa waaxda arrimaha Xajka ee Soomaaliya, Qadar Xaaji Daahir.

Saraakiishu waxay sheegeen in imaatinka xujeydan uu muujinayo bilowga cibaadada xajka ee muwaadiniinta Soomaaliyeed.

Xujeyda ayaa lagu soo dhaweeyay biyaha Zamzam-ka, oo ka mid ah martisoorka soo jireenka ah ee Sacuudiga, halka mas’uuliyiinta Soomaaliduna ay sheegeen in diyaargarow ballaaran la sameeyay si loo xaqiijiyo gaadiid casri ah, hoy iyo isku dubarid wanaagsan.

Xujeyda ayaa la filayaa inay dhowr maalmood ku qaataan Madiina ka hor inta aysan u gudbin Maka si ay u soo gutaan rukunada Xajka.

Safiirka ayaa sheegay in dowladaha Soomaaliya iyo Sacuudiga ay iska kaashadeen fududeynta gudashada Xajka, halka Dr. Qadar Xaaji Daahir uu xusay in isku dubaridka lala sameeyay wakaaladaha socdaalka uu ujeedkiisu yahay in xujeyda loo xaqiijiyo adeeg tayo leh.