Muqdisho (Dawan)- Waddooyinka Muqdisho waxaa buux dhaafiyay dadweyne u dabaaldegaya Mowliidka Nabi Muxamed (NNKH). Isu-soo-baxyada, akhrinta Qur’aanka, nabi amaanka iyo maansooyinka lagu ammaanayo Nabiga ayaa magaalada ka socday maalmo, iyadoo xuskan uu weli meel muhiim ah kaga jiro dhaqanka diimeed ee Soomaalida.
Waddooyinka Muqdisho waxaa maalmahan ka socday isu-soo-baxyo iyo socod ay dadweyne kaga qeybqaadanayaan xuska dhalashada Nabi Muxamed (NNKH).
Rag, dumar iyo carruur ayaa qeyb ka ahaa socodka, iyagoo maraya qeybo kala duwan oo magaalada ah, wata calamo, kuna dhawaaqaya erayo lagu weyneynayo laguna xusayo Nabi Muxamed (NNKH).
Munaasabadaha Mowliidka ayaa Muqdisho ka socday tan iyo markii ay curatay bisha Mowliidka, waxaana ka qeybgalayay Soomaali da’ kasta leh oo isugu imaanayay masaajiddo, fagaarayaal iyo xarumo kala duwan.
Goobaha lagu qabtay xusaska waxaa lagu akhriyayay Qur’aanka Kariimka ah, sidoo kalena waxaa lagu soo bandhigayay anbi amaano kala duwan oo lagu xusayo Nabi Muxamed (NNKH).
Mid ka mid ah goobaha ay dad badan isugu yimaadeen ayaa ahayd Barxadda Daljirka Dahsoon, halkaas oo ay jamaacooyin kala duwan isugu soo baxeen, iyagoo wata calamo ay ku xardhan yihiin magaca Nabi Muxamed iyo erayo la xiriira xuska Mowliidka.
Mowliidka ayaa Soomaaliya looga aqoonsan yahay maalin fasax qaran, taas oo fursad u siisa jamaacooyinka iyo dariiqooyinka Suufiyada, oo ay kamid yihiin Qaadiriyada, Axmediyada iyo Saalixiyada, inay si weyn uga qeybqaataan xusaska iyo munaasabadaha lagu maamuusayo dhalashada Nabi Muxamed (NNKH).
