Baydhabo (Dawan) – Ururka Cadaaladda iyo Wadajirka ayaa ku guuleystay kuraasta ugu badan ee Golaha Wakiillada Dowlad Goboleedka Koonfur Galbeed, kadib markii uu helay 67,970 cod, taas oo u dhiganta 53 % codadka ansaxa ah.
Natiijada doorashada Golaha Wakiillada Koonfur Galbeed ayaa muujisay in lagu tartamay 95 kursi, iyadoo doorashadu ka dhacday 13 degmo. Guud ahaan, waxaa tartanka ka qeyb galay 32 urur siyaasadeed.
Tirada guud ee codbixiyeyaasha codeeyay ayaa gaartay 132,430, halka codadka ansaxa ah ay noqdeen 128,276, oo u dhiganta 97 %. Codadka xumaaday ayaa gaaray 4,154, oo u dhiganta 3 %.
Ururka Cadaaladda iyo Wadajirka ayaa ku guuleystay 51 kursi, isagoo si weyn uga horreeyay ururradii kale ee tartanka ku jiray. Ururka Horumar iyo Midnimo Qaran ayaa galay kaalinta labaad, isagoo helay 18,667 cod iyo 14 kursi.
