Uzbekistan (Dawan)— Yasiin Suleymaan Xasan oo u dhashay Jabuuti ayaa loo doortay Madaxweyne-ku-xigeenka Xiriirka Caalamiga ah ee Shaxda (FIDE), doorasho la sheegay inay sare u qaadayso matalaadda dalkaas ee hay’adaha hoggaamiya ciyaaraha caalamka sida ay sheegtay wakaalada wararka Jabuuti
Doorashada ayaa dhacday sabtidii intii uu socday shirweynihii guud ee FIDE ee lagu qabtay magaalada Samarkand ee dalka Uzbekistan, halkaas oo lagu dhisay hoggaanka cusub ee ururka ee muddada soo socota..
Yasiin Suleymaan Xasan ayaa hadda hoggaamiya Xiriirka Shaxda Jabuuti iyo Aagga 4.4, waxaana doorashadiisu ay u sahleysaa inuu ka mid noqdo mas’uuliyiinta dejinaya siyaasadaha iyo qorshayaasha mustaqbalka ee ciyaarta shaxda adduunka. FIDE waa hay’adda ugu sarreysa ee maamusha ciyaarta shaxda caalamka, waxaana hoos yimaada in ka badan 200 oo xiriir qaran.
Guddiga Qaranka Olombikada iyo Ciyaaraha Jabuuti (CNOSD) ayaa doorashada ku tilmaamay guul iyo sharaf weyn oo u soo hoyatay dalka. “Doorashadani waxay sharaf weyn u tahay Jamhuuriyadda Jabuuti,” ayuu guddigu ku sheegay bayaan uu soo saaray.