Yurub oo $120 milyan u qoondeysay horumarinta Soomaaliya

Muqdisho (Dawan)— Midowga Yurub ayaa maanta oo Khamiis ah u dhawaaqay €102 milyan oo yuuro (oo u dhiganta $120 milyan oo doolar) oo kaalmo ah oo loogu talagalay Soomaaliya, taas oo lagu taageerayo xasilinta, horumarinta dhaqaalaha, waxbarashada, iyo maaraynta socdaalka muddada saddexda sano ee soo socota.

Taageeradan ayaa lagu shaaciyay munaasabad ka dhacday xarunta Midowga Yurub ee Muqdisho, waxaana ka qaybgalay Safiirka Midowga Yurub ee Soomaaliya, Francesco De Maura, Agaasimaha Ku-xigeenka Guud ee Midowga Yurub, Myriam Ferran, Wasiirka Maaliyadda Soomaaliya, Biixi Iimaan Cige, iyo Wasiirka Qorsheynta, Maxamuud Cabdiraxmaan Beenebeene.

“Myalgashigan wuxuu sii xoojinayaa taageerada aan u fidinno horumarka Soomaaliya,” ayay tiri Myriam Ferran. iyada oo raacisay “Waxa uu diiradda saaraya xasilinta dhaqaalaha, xoojinta hufnaanta maamulka, iyo hagaajinta maaraynta socdaalka.”

Sidee loo qeybiyay taageerada?

Lacagtan ayaa loo kala qoondeeyay afar mudnaan oo waaweyn: €30 milyan oo lagu taageerayo dhismaha dowladnimada iyo horumarinta dhaqaalaha, gaar ahaan dib-u-habaynta maaliyadda dadweynaha; €27 milyan oo loogu talagalay maaraynta socdaalka, taageeridda qaxootiga iyo barakacayaasha gudaha; €25 milyan oo lagu horumarinayo nidaamka waxbarashada; iyo €20 milyan oo lagu xoojinayo xasilinta gobollada ay colaadaha saameeyeen.

Wasiirka Qorsheynta, Maxamuud Cabdiraxmaan Beenebeene, ayaa bogaadiyay joogtaynta taageerada Midowga Yurub ee Soomaaliya, isagoo sheegay: “Midowga Yurub wuxuu si joogto ah u garab istaagay Soomaaliya sannadihii la soo dhaafay. Dowladda Soomaaliya waxay ballanqaadaysaa in si hufan oo wax ku ool ah loo maamulo loona isticmaalo dhaqaalahan.”

Dhankiisa, Wasiirka Maaliyadda, Biixi Iimaan Cige, ayaa sheegay in maalgelintani ay “gacan ka geysan doonto dhisidda dhaqaale adkaysi leh oo waara,” inkastoo uusan faahfaahin jadwalka fulinta ama qaabka lacagta loogu qaybinayo dowlad-goboleedyada.

Ku dhawaaqistan ayaa imaaneysa xilli ay Soomaaliya wajahayso abaaro soo noqnoqday iyo caqabado amni oo daba dheeraaday. Qaybta maaraynta socdaalka ayaa sidoo kale ka tarjumaysa walaaca Yurub ee ku aaddan socdaalka sharci-darrada ah ee ka imanaya Geeska Afrika.

Midowga Yurub ayaa ka mid ah deeq-bixiyeyaasha ugu waaweyn ee Soomaaliya, isagoo si gaar ah diiradda u saara barnaamijyada horumarinta bulshada, xoojinta hay’adaha dowladda, iyo kobcinta dhaqaalaha.