Muqdisho (Dawan) – Midowga Yurub ayaa ugu baaqay hoggaamiyeyaasha Soomaaliya in ay sii wadaan wada-hadallada iyo is-afgaradka siyaasadeed, kaddib markii uu fashil ku dhammaaday shirkii u dhexeeyay dowladda federaalka iyo hoggaamiyeyaasha mucaaradka ee Madasha Mustaqbalka Soomaaliya, kaas oo ka socday maalmihii lasoo dhaafay magaalada Muqdisho.
Hadalkan ayay shalay ka sheegtay Francesca Di Mauro, Safiirka Midowga Yurub ee Soomaaliya, munaasabad afur ah oo uu xafiiska Midowga Yurub ee Soomaaliya u sameeyay mas'uuliyiin dowladeed iyo qaar ka mid ah diblomaasiyiinta ku sugan dalka iyada oo xustay in wada-hadalku uu yahay mid adag balse lama huraan u ah xasilloonida siyaasadeed, midnimada qaranka, iyo ilaalinta danta guud ee shacabka Soomaaliyeed.
Safiiraddu waxay sheegtay inay rajaynayso in hoggaamiyeyaasha Soomaaliyeed ay qaataan qiyamka bisha barakaysan ee Ramadaan, gaar ahaan wada-hadalka, is-fahamka, iyo ku dadaalidda wanaagga guud. Waxay sidoo kale xustay in Soomaaliya ay taariikh ahaan mar walba ku guulaysatay inay gaarto heshiisyo xilliyada adag, isla markaana ay rajaynayso inay markhaati ka noqoto waqti kale oo is-afgarad lagu gaaro.
