Muqdisho (Dawan) – 19-ka dal ee saxiixay Wax-ka-beddelka Jeddah ee Xeerka Anshaxa Jabuuti, oo ay ku jirto Soomaaliya, ayaa taageeray qorshe lagu dhisayo Ciidan-badeed Wadajir ah (DCoC/JA), si loo xoojiyo iskaashiga gobolka ee ka dhanka ah burcad-badeednimada iyo weerarrada hubaysan ee maraakiibta.
19-ka dal ayaa kala ah Bahrain, Comoros, Jabuuti, Itoobiya, Faransiiska, Urdun, Kenya, Madagascar, Maldives, Mauritius, Mozambique, Cumaan, Sacuudiga, Seychelles, Soomaaliya, Koonfur Afrika, Imaaraadka Carabta, Tanzania iyo Yemen.
Qorshahan waxaa soo jeediyay Guddiga Hagidda Xeerka Anshaxa Jabuuti, kadib kulan aan caadi ahayn oo ay yeesheen 29-kii Luulyo 2026, kaas oo looga hadlayay sidii loo xoojin lahaa iskaashiga hawlgal ee gobolka, sida lagu sheegay bayaanka Guddoomiyaha DCoC/JA Metse Ralephenya oo ka socda Koonfur Afrika 13-kii Agoosto.
Talo-bixinta ayaa lagu ansixiyay kulan ay 5-tii Agoosto 2026 yeesheen Xiriiriyeyaasha Qaranka ee DCoC, kuwaas oo Kooxda Shaqada 3-aad u xilsaaray inay diyaariso qaab-dhismeedka hawlgal ee ciidanka la qorsheeyay.
Ciidanka la qorsheeyay wuxuu ka shaqayn doonaa Badweynta Hindiya ee Galbeedka iyo Gacanka Cadmeed, halkaas oo ay soo cusboonaadeen burcad-badeednimada iyo dhaca hubaysan ee ka dhanka ah maraakiibta.
Qorshuhu wuxuu dhigayaa in saraakiil ka socda dalalka xeebaha ah la raaciyo maraakiibta ciidamada badda ee ka qaybgalaya hawlgallada. Saraakiishaas, oo loo yaqaan sea-riders, ayaa gacan ka geysan doona isku-xirka ciidamada, xog-ogaalka xaaladda badda iyo hawlgallada ka gudbaya xuduudaha.
Ciidanka cusub ma beddeli doono howlgalada ciidamada badda ee caalamiga ah ee hadda ka socda gobolka, balse wuxuu kaabaya howlgalada ay wadaan Ciidamada Badda ee Isbahaysiga Caalamiga ah, Ciidanka Wadajirka ah ee Hawlgalka 151-aad ee la dagaallanka burcad-badeedda, Ciidanka Badda Midowga Yurub ee Soomaaliya (EU NAVFOR), iyo ciidamada badda ee dalalka si madax-bannaan u hawlgala.