Muqdisho (Dawan) – Ra’iisul Wasaaraha Soomaaliya, Xamsa Cabdi Barre, ayaa maanta oo Isniin ah su’aal ka keenay in lacagaha badan ee la siiyo qoysaska Soomaaliyeed ay wax ka beddelaan noloshooda, isaga oo ku baaqay in go’aannada dowladda iyo qoondaynta miisaaniyadda lagu saleeyo xog iyo caddayn.
Ra’iisul Wasaaruhu wuxuu hadalkan jeediyay xilli uu si rasmi ah u furay Shirweynaha Saddexaad ee Qaranka ee Dabagalka iyo Qiimaynta Soomaaliya (SNMEC 2026), oo ka socda magaalada Muqdisho. Shirka oo soconaya muddo laba maalmood ah waxaa soo qabanqaabisay Wasaaradda Qorshaynta, Maalgashiga iyo Horumarinta Dhaqaalaha.
“Lacago caddaan ah ayaa la siiyaa dad Soomaaliyeed, waad ogtihiin, waana lacago badan. Qoysaska ayaa la siiyaa, SIM Card ayaa la siiyaa, bil kasta ayaana lacag loogu shubaa. Su’aasha muhiimka ahi waxay tahay: ma ognahay waxa ay lacagtaasi ka beddesho noloshooda?” ayuu yiri Xamsa. Wuxuu isweydiiyay in lacagahaasi ay wax ka beddeleen nafaqada, caafimaadka iyo waxbarashada carruurta, iyo in ay wax ka beddeleen guud ahaan nolosha qoysaska, mise ay kaliya ka caawinayaan inay ka gudbaan baahiyaha maalinlaha ah.
“Horumarku waa inuu qofka ka saaraa xaaladda degdegga ah, una horseedaa inuu isku filnaado,” ayuu yiri Ra’iisul Wasaaruhu.