Addis Ababa (Dawan) – Itoobiya, maanta oo Isniin ah waxaa loo dareeray doorashooyinka baarlamaanka federaalka iyo goleyaasha deegaanada, kuwaas oo ka dhacaya 11 maamul goboleed oo ka mid ah 12-ka maamul goboleed ee dalkaas ka kooban yahay. Doorashadan ayaa ah tii toddobaad tan iyo markii la ansixiyay dastuurka dalka sanadkii 1995.
Halkan waxaan idin kula wadaageynaa 8 qodob oo muhiim ah oo laga fahmi karo doorashada maanta ka dhacday Itoobiya:
1. Yaa xaq u leh inay codeeyaan?
In ka badan 50 milyan oo codbixiye ayaa xaq u leh inay ka qeyb qaataan doorashada, iyadoo tirada guud ee shacabka Itoobiya lagu qiyaaso ku dhowaad 130 milyan oo qof. Codbixintu waxay ka socotaa ku dhowaad 48,000 oo xarumood, kuwaas oo albaabbadooda la furay saaka aroortii.
2. Immisa xisbi ayaa tartamaya?
Doorashada waxaa ka qeyb galaya 42 xisbi siyaasadeed, kuwaas oo ku tartamaya 547 kursi oo ka tirsan Baarlamaanka Federaalka Itoobiya iyo 2,764 kursi oo ka tirsan goleyaasha heer deegaan.
3. Waa sidee awoodda mucaaradku?
Xisbiyada mucaaradka ayaa wajahaya caqabado ay ka mid yihiin kala qaybsanaan gudaha ah, dhaqaale xaddidan iyo xannibaado siyaasadeed. Qaar ka mid ah siyaasiyiinta mucaaradka ayaa ku sugan dibadda, halka kuwo kalena ay xabsi ku jiraan ama laga hor istaagay dhaqdhaqaaqyadooda siyaasadeed.
4. Yaa ugu cadcad doorashada?
Falanqeeyayaal badan ayaa saadaalinaya in Xisbiga Barwaaqo (Prosperity Party) ee Ra’iisul Wasaare Abiy Axmed inuu markale ku guuleysan doono doorashada. Doorashadii 2021, xisbiga ayaa helay aqlabiyad ballaaran oo baarlamaanka ah.
