Afwerki oo Masar u Ambabaxay xilli Kulan Afar Geesood ah oo La Filayo

Asmara (Dawan)— Madaxweynaha Eritrea Isaias Afwerki ayaa maanta oo Sabti ah ugu ambabaxay Masar booqasho shaqo, kaddib casuumaad uu ka helay Madaxweynaha Masar Abdel Fattah el-Sisi, sida uu sheegay Wasiirka Warfaafinta Eritrea Yemane Gebreab Meskel.

Afwerki ayaa ka qaybgeli doona shir ay yeelanayaan madaxda dowladaha oo diiradda lagu saarayo amniga wadajirka ah, xasilloonida iyo iskaashiga, sida uu Meskel ku sheegay qoraal uu soo dhigay X. Wuxuu sheegay in shirkan uu yahay mid sii ambaqaadaya shirar xilliyo hore oo looga hadlayay guud ahaan gobolka, gaar ahaan Badda Cas, Gacanka Cadmeed, Gacanka Carabta iyo wabiga Niilka.

Afwerki iyo Sisi ayaa sidoo kale inta uu booqashada ku jiro ka wada hadli doona sidii loo sii xoojin lahaa xiriirka labada dal, sida Meskel uu sheegay.

Madaxweynaha Soomaaliya Xasan Sheekh Maxamuud ayaa sidoo kale ku sugan Masar, halkaas oo uu uga qaybgalaayo Madasha Afrika ee Al-alamein, oo ay ka qaybgalayaan in ka badan 20 madax dowladeed iyo kuwo xukuumadeed oo Afrikaan ah ama wakiilladooda. Madaxtooyada Masarna waxay sheegtay in madashu soconayso 2 ilaa 4 Oktoobar, isla markaana ay jiri doonaan kulamo laba geesood iyo dhinacyo badan ah oo dhex mara madaxda iyo mas’uuliyiinta Afrika.

Dawan waxay ogaatay in inta Madaxweyne Xasan Sheekh uu ku sugan yahay Masar, la filayo inuu ka qaybgalo kulan gaar ah oo afar geesood ah, kaas oo ay yeelanayaan Madaxweynaha Masar Abdel Fattah el-Sisi, Madaxweynaha Eritrea Isaias Afwerki, Madaxweynaha Soomaaliya Xasan Sheekh Maxamuud iyo hoggaamiyaha Suudaan Abdel Fattah al-Burhan.

Kulanka la filayo ayaa ku soo beegmaya xilli ay sii kordheen xiisadaha Geeska Afrika. Midowga Afrika ayaa 1-dii Oktoobar ugu baaqay Itoobiya, Eritrea iyo Masar inay muujiyaan is-xakameyn, ayna khilaafaadkooda ku xalliyaan waddooyin diblomaasiyadeed iyo wada-hadal nabadeed.