Muqdisho (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si adag u dhaliilay siyaasadda Imaaraadka Carabta, isaga oo ku eedeeyay faragelin joogto ah oo uu ku hayo arrimaha gudaha Soomaaliya, wiiqidda madax-bannaanida dalka iyo taageeridda kala-qaybsanaanta siyaasadeed iyo amni ee halis gelinaysa midnimada qaranka.
Khudbad uu telefishinka ka jeediyay oo uu kaga hadlayay xiriirka labada dal, ayuu Madaxweynuhu ku soo bandhigay eedeymo kala duwan oo uu u jeediyay Imaaraadka, kuwaas oo la xiriira heshiisyada dekedaha, dhaqdhaqaaqyada milatari, faragelinta siyaasadeed iyo mowqifka Abu Dhabi ee Somaliland.
Xasan Sheekh ayaa xusay xiriirka taariikheed, diimeed, dhaqan iyo ganacsi ee Soomaaliya iyo Imaaraadka, isaga oo xusuusiyay in dalkaasi uu martigeliyay kumannaan Soomaali ah xilligii dagaallada sokeeye, isla markaana uu dad badan oo Soomaaliyeed siiyay fursado shaqo, kana caawiyay inay xawaalado u diraan ehelkooda. Hase yeeshee, waxa uu sheegay in siyaasadaha dambe ee Imaaraadku ay si weyn u dhaawaceen kalsoonidii ka dhexeysay labada dal.
Madaxweynaha ayaa Imaaraadka ku eedeeyay inuu heshiisyo la galay maamullada gobollada ee ku saabsan dekedaha Berbera, Boosaaso iyo Kismaayo, isaga oo aan kala tashan Dowladda Federaalka Soomaaliya. Waxa uu carrabka ku adkeeyay in dekedahaasi yihiin hanti qaran oo ay wada leeyihiin dhammaan shacabka Soomaaliyeed, isla markaana heshiisyada khuseeya hantida iyo danaha qaranka ay tahay in lala galo Dowladda Federaalka. Waxa uu sidoo kale Abu Dhabi ku eedeeyay inay Soomaaliya ka dhistay saldhigyo milatari iyo ciidamo amni oo ka baxsan nidaamka amniga qaranka, isla markaana aan fasax ka haysan dowladda federaalka. Waxa uu sheegay in ciidamada ka hawlgala meel ka baxsan silsiladda taliska qaranku ay wiiqayaan hay'adaha amniga, caqabadna ku yihiin dadaallada lagu mideynayo ciidamada qalabka sida ee dagaalka ka dhanka ah kooxaha argagixisada.
Dhanka siyaasadda, Xasan Sheekh ayaa sheegay in Imaaraadku taageero dhaqaale iyo mid siyaasadeed siiyay maamullada qaarkood si ay uga horyimaadaan Dowladda Federaalka. Waxa uu ku eedeeyay Abu Dhabi inay sii hurinayso khilaafaadka siyaasadeed ee gudaha, isla markaana ay wiiqayso hay'adaha dowladda, taas oo Soomaaliya u nugleynaysa faragelin dibadeed.
Madaxweynuhu waxa kale oo uu ka hadlay aqoonsiga ay Israa'iil siisay Somaliland, isaga oo Imaaraadka ku eedeeyay inuu door weyn ku lahaa tallaabadaas. Waxa uu intaas ku daray in Abu Dhabi ay diiday inay saxiixdo bayaanno ay si wadajir ah u soo saareen dalalka Carabta iyo kuwa Islaamka, kuwaas oo lagu cambaareeyay aqoonsigaas, laguna tilmaamay mid ka hor imaanaya madax-bannaanida iyo midnimada dhuleed ee Soomaaliya. Xasan Sheekh ayaa sidoo kale soo hadal qaaday dhacdo uu sheegay inay dhacday bishii Janaayo, taas oo dekedda Berbera loo adeegsaday marin ay koox gooni-u-goosad ah oo Yemen ka baxsanaysay lagu soo mariyay. Waxa uu ku eedeeyay Imaaraadka inuu hawlgalkaas fuliyay isaga oo aan ogeysiin ama oggolaansho ka haysan Dowladda Soomaaliya, isla markaana dhulka Soomaaliyeed u adeegsaday sidii meel aan hoos imaanayn awoodda dowlad madax-bannaan.