Muqdisho(Dawan) – Hay’adaha u xilsaaran dib-u-eegista iyo hirgelinta Dastuurka Jamhuuriyadda Federaalka Soomaaliya ayaa soo bandhigay application cusub oo u oggolaanaya shacabka inay si fudud uga helaan nuqulka dastuurka, iyadoo sidoo kale la daabacay 50,000 nuqul oo buugga dastuurka ah.
Munaasabad lagu soo bandhigayay application-ka iyo buugga dastuurka ayaa waxaa ka qeyb galay Ku-simaha Guddoomiyaha Golaha Shacabka ahna Guddoomiye Ku-xigeenka 1-aad, Xildhibaan Sacdiyo Yaasiin Xaaji Samatar; Guddoomiye Ku-xigeenka 1-aad ee Aqalka Sare, Senator Cali Shacbaan Ibraahim; Guddiga Madaxa-bannaan ee Dib-u-eegista iyo Hirgelinta Dastuurka; Guddiga La-socodka Dastuurka ee Baarlamaanka Federaalka Soomaaliya; iyo Wasaaradda Caddaaladda iyo Arrimaha Dastuurka.
Mas’uuliyiintii ka hadlay munaasabadda ayaa sheegay in application-ka cusub iyo buugga dastuurka ay sahli doonaan in muwaadiniinta Soomaaliyeed, meel kasta oo ay joogaan, ay dastuurka ka akhrisan karaan taleefannadooda gacanta ama nuqullada daabacan.
Waxay tilmaameen in helitaanka dastuurku uu muhiim u yahay kor u qaadista wacyiga bulshada, dhaqangelinta sharciga iyo xaqiijinta in hay’adaha dowladda ay ku shaqeeyaan qodobada dastuurka.
Ku-simaha Guddoomiyaha Golaha Shacabka, Xildhibaan Sacdiyo Yaasiin Xaaji Samatar, ayaa sheegtay in dhammeystirka dastuurku uu yahay guul qaran, balse loo baahan yahay in laga dhigo mid lagu dhaqmo. Waxay ku baaqday in dastuurka la gaarsiiyo dhammaan bulshada, gaar ahaan dhalinyarada, ardayda iyo xarumaha waxbarashada.
Guddoomiyaha Guddiga Madaxa-bannaan ee Dastuurka, Burhaan Aadan Cumar, iyo Ku-simaha Guddoomiyaha Guddiga La-socodka Dastuurka ee Baarlamaanka Federaalka Soomaaliya, Senator Saciid Cawke, ayaa sheegay in dastuurku aanu noqon karin buug meel lagu keydiyo, balse loo baahan yahay in shacabka iyo hay’adaha dowladdu bartaan, ku dhaqmaan, isla markaana ilaaliyaan qodobadiisa.
Guddoomiye Ku-xigeenka 1-aad ee Aqalka Sare, Senator Cali Shacbaan Ibraahim, ayaa dhankiisa sheegay in Soomaaliya ay u baahan tahay nidaam sharciyeed adag oo lagu kalsoonaan karo, kaas oo hagaya dowladnimada isla markaana muujinaya in dalku leeyahay hannaan sharci oo dhameystiran.
