Muqdisho (Dawan)— Guddiga Xeer-hoosaadka, Anshaxa, Xasaanadda iyo Daryeelka Senatorrada ee Aqalka Sare ayaa digniin rasmi ah u diray 20 senator oo ka mid ah 54-ta xubnood ee Golaha, kaddib markii ay ka maqnaadeen fadhigii Golaha ee 26-ka Agoosto, sida lagu sheegay warqad uu guddigu soo saaray.
Guddigu wuxuu sheegay in senatorrada lagu xusay warqadda ay ka maqnaayeen fadhigii ugu horreeyay ee kalfadhiga siddeedaad, wuxuuna xusay muhiimadda ay leedahay joogteynta ka qaybgalka fadhiyada iyo gudashada waajibaadka dastuuriga ah.
Aqalka Sare ee Soomaaliya wuxuu ka kooban yahay 54 senator, kuwaas oo matala dowlad-goboleedyada xubnaha ka ah federaalka.
Guddigu wuxuu senatorrada xusuusiyay inay waajib ku tahay inay ka qaybqaataan fadhiyada Golaha isla markaana gutaan waajibaadka loo igmaday sida ku cad xeer-hoosaadka Aqalka Sare.
Guddigu wuxuu sidoo kale ka digay in senatorrada sii wada maqnaanshaha fadhiyada ay wajihi karaan tallaabooyin anshaxeed oo waafaqsan xeerarka gudaha ee Golaha.
