Askar iyo dad shacab oo ku dhaawacmay qarax bambo oo ka dhacay Hargeysa

Hargeysa (Dawan)- ugu yaraan afar qof, oo ay ku jiraan laba askari oo ka tirsan Ciidanka Milatariga Somaliland, ayaa ku dhaawacmay qarax bambo-gacmeed oo xalay abbaaro 7:00 fiidnimo ka dhacay magaalada Hargeysa ee Caasimada somaliland.

Laba askari ayaa goobta fadhiyey xilliga uu qaraxu dhacay, halka labada qof ee shacabka ah ay ku sugnaayeen goobta.

Dhammaan dadka dhaawacmay ayaa loo qaaday Cisbitaalka Guud ee Hargeysa si loogu dabiibo dhaawacyada soo gaaray.

Ciidanka Booliska Somaliland ayaa sheegay in xogta hordhaca ah ay muujinayso in bambo-gacmeedku uu dhulka kaga dhacay mid ka mid ah askarta dhaawacantay, islamarkaana aanay jirin wax tilmaamaya in si ula kac ah loogu tuuray goobta.

Booliska ayaa sheegay in baaritaan dheeraad ah uu socdo si loo xaqiijiyo sida ay bambo-gacmeedku ku timid goobta iyo duruufaha saxda ah ee sababay qaraxa.

Dhacdadan ayaa sidoo kale dhalisay warar lagu faafiyey baraha bulshada oo lagu sheegay in qarax weyn uu ka dhacay Hargeysa. Booliska ayaa wararkaas ku tilmaamay kuwo marin-habaabin ah, iyagoo bulshada ugu baaqay inay ka fogaadaan faafinta xog aan la xaqiijin.

Majiraan ilo ka madax-banaan ciidamada somaliland oo xaqiijiyay khasaaraha kadhashay qaraxaasi kadhacay hargeysa.

Baaritaanka dhacdada ayaa weli socda, iyadoo la filayo in faahfaahin dheeraad ah laga helo marka ay hay’adaha amnigu soo gabagabeeyaan baaritaankooda.