Muqdisho (Dawan) – Wasaaradda Gaashaandhigga Soomaaliya ayaa shaacisay in askar ka tirsan Ciidanka Xoogga Dalka Soomaaliyeed laga saaray shaqada, kaddib markii lagu helay isticmaalka maandooriye, anshax-xumo iyo gudasho la’aan waajibaadkooda, falalkaas oo ay Wasaaraddu ku tilmaamtay inay si cad uga hor imanayan sharciga, anshaxa iyo nidaamka ciidanka.
War-saxaafadeed ka soo baxay Wasaaradda ayaa lagu sheegay in tallaabadan ay ka dambeysay baaritaanno iyo dabagal lagu sameeyay hab-dhaqanka askarta, kuwaas oo muujiyay ku lug lahaanshahooda falal si toos ah u dhaawacaya anshaxa ciidannimo, badqabka hawlaha amniga iyo kalsoonida shacabka.
Bayaanka ayaa lagu adkeeyay in Ciidanka Xoogga Dalka ay ku shaqeeyaan xeerar adag oo ku saleysan anshax, mas’uuliyad iyo ilaalinta sharciga, isla markaana aan marnaba la aqbali doonin isticmaalka maandooriyaha, anshax-xumada ama fal kasta oo wax u dhimaya sumcadda ciidanka.
