AUSSOM oo cunto u qeybisay qoysas danyar ah

Baydhabo (Dawan)— Ciidamada Howlgalka Midowga Afrika ee Taageerada iyo Xasilinta Soomaaliya (AUSSOM), gaar ahaan qaybtooda saddexaad, ayaa Khamiistii deeq cunto ah u qeybiyay 100 qoys oo danyar ah oo ku nool magaalada Baydhabo, xilli gobolka uu weli wajahayo xaalad bani’aadantinimo oo ka dhalatay abaarta sii xoogeysanaysa inta lagu jiro bisha barakeysan ee Ramadaan.

Gargaarkan oo isugu jiray bariis, saliid iyo baasto ayaa loogu talagalay in lagu caawiyo qoysaska si ay ugu diyaar garoobaan afurka.

Baydhabo, oo ka mid ah magaalooyinka ay ku barakaceen dad badan oo gudaha dalka ah, ayaa wajahaysa koror weyn oo baahiyaha bani’aadantinimo ah kadib afar xilli roobaad oo xiriir ah oo baaqday, kuwaas oo sababay barakaca malaayiin qof guud ahaan dalka.

“Tani waxay qoysaska u sahlaysaa inay helaan raashin ay ku afuraan,” ayuu yiri Taliyaha Qaybta Saddexaad ee AUSSOM, sarreye guuto Teklu Hurisa Janka, sida lagu baahiyay barta X ee howlgalka, isagoo xusay in taageerada bulshada ay qeyb ka tahay waajibaadka howlgalka ee nabad ilaalinta iyo la dagaallanka kooxda Al-Shabaab.

Ku-xigeenka guddoomiyaha amniga iyo siyaasadda ee degmada Baydhabo, Maxamed Isaaq Cali, ayaa uga mahadceliyay ciidamada Midowga Afrika kaalmada ay gaarsiiyeen bulshada xilli uu ku tilmaamay mid aad u adag.

Tallaabadan ayaa ku soo beegmaysa xilli Soomaaliya ay wajahayo hoos u dhac dhaqaale oo saameeyay howlaha gurmadka bani’aadantinimo. Warbixinno dhowaan la soo saaray ayaa muujinaya in wax ka yar saddex-meelood meel dadka u baahan gargaarka cuntada ay heleen taageero dabayaaqadii 2025, iyadoo la saadaalinayo in haqab-beel la’aanta cuntadu ay saameyn doonto ilaa 5.9 milyan oo qof horraanta 2026.