Riyadh (Dawan) – Xoghayaha Guud ee Golaha Iskaashiga Khaliijka (GCC), Jaasim Maxamed Al-Budaywi, ayaa cambaareeyay waxa uu ku tilmaamay “hadallo aan mas’uuliyad lahayn” iyo “ololeyaal warbaahineed oo xaasidnimo ah” oo lagu beegsanayo Imaaraadka Carabta, kuwaas oo uu sheegay inay faafinayaan mas’uuliyiinta Dowladda Federaalka Soomaaliya. War-saxaafadeed uu soo saaray ayuu Al-Budaywi ku sheegay in Imaaraadku uu wax weyn ku soo kordhiyo dadaallada lagu xoojinayo amniga iyo xasilloonida, isla markaana uu door muhiim ah ka qaato dhiirrigelinta wada-hadallada dowladaha.
Wuxuu tilmaamay in martigelintii uu Imaaraadku dhowaan u sameeyay wareeg ka mid ah wada-hadallada Ruushka iyo Ukraine ay caddeyn u tahay sida mas’uuliyadda leh ee uu uga shaqeynayo xaqiijinta nabadda iyo amniga gobolka iyo caalamka.
Xoghayaha Guud ayaa sheegay in eedeymahan uu ku tilmaamay kuwo aan la aqbali karin ay ujeeddadoodu tahay wiiqidda dadaallada Imaaraadku ku bixinayo xoojinta wada-hadallada iyo iskaashiga heer gobol iyo heer caalami. Al-Budaywi ayaa adkeeyay in dowladaha xubnaha ka ah Golaha Iskaashiga Khaliijka ay ka go’an tahay xoojinta amniga, xasilloonida iyo barwaaqada, ayna si buuxda u diidan yihiin olole kasta oo warbaahineed oo looga gol leeyahay in lagu sumcad-dilo dowlad ka mid ah dalalka xubnaha ka ah. Wuxuu sidoo kale ku nuuxnuuxsaday in ololayaashaasi aysan saameyn ku yeelan doonin sii wadista doorka dalalka Khaliijka ee taageerada nabadda iyo amniga gobolka iyo caalamka.