Qaahira (Dawan) – Hoggaamiyeyaasha Baarlamaannada Carabta ayaa si wadajir ah u cambaareeyay weerarrada Israel ee ka dhacay Lubnaan iyo Suuriya, waxayna si adag uga soo horjeesteen faragelinta Israel ee arrimaha Soomaaliya intii lagu guda jiray Shirweynaha 8-aad ee Baarlamaanka Carabta iyo Guddoomiyaasha Baarlamaannada Carabta.
Shirka oo ay soo qabanqaabiyeen Baarlamaanka Carabta iyo Ururka Midowga Baarlamaannada Carabta ayaa lagu adkeeyay midnimada mowqifka baarlamaannada Carabta ee ku aaddan caqabadaha horyaalla gobolka, iyadoo la xaqiijiyay taageerada dadaallada lagu ilaalinayo madaxbannaanida, amniga iyo midnimada dhuleed ee dalalka Carabta.
Soomaaliya ayaa ka mid ahayd dalalkii ka qeyb galay shirka, waxaana matalayay wafdi heer sare ah oo ka socday Aqalka Sare ee Baarlamaanka Federaalka Soomaaliya.
