Muqdisho (Dawan)- Golaha Shacabka ee Baarlamaanka Federaalka Soomaaliya ayaa maanta kulan ku yeeshay xarunta Golaha, iyadoo xildhibaannadu ay akhrinta koowaad marsiiyeen Hindise Sharciyeedka Dhismaha Hay’adda Dakhliga Qaranka.
Kulanka oo ahaa kalfadhiga 8-aad, kulankiisa 3-aad, waxaa shir guddoomiyey Guddoomiyaha Golaha Shacabka, Cabdulqaadir Maxamed Nuur (Jaamac).
Hindise-sharcigan oo ay soo gudbisay Wasaaradda Maaliyadda ayaa Golaha loo horgeeyey si loo bilaabo hannaanka sharciyeed ee lagu dhisayo Hay’adda Dakhliga Qaranka. Warbixinta akhrinta koowaad ee hindise-sharciga ayaa xildhibaannada u akhriyey Wasiirka Wasaaradda Maaliyadda ee Xukuumadda Federaalka Soomaaliya, Biixi Iimaan Cige.
Sidoo kale, Golaha Shacabka ayaa akhrinta koowaad marsiiyey Hindise Sharciyeedka wax-ka-beddelka Sharciga Bangiga Dhexe ee Soomaaliya, Sharci Lr. 30 ee soo baxay 20-kii Abriil 2012.