Maqaalka waa la soo dejinayaa...
Go’aankan ayaa xoojinaya iskaashiga iyo xiriirka diblomaasiyadeed ee Soomaaliya iyo Turkiga.
Ankara (Dawan)- Baarlamaanka dalka Turkiga ayaa Jimcihii ansixiyay hindise sharciyeed oggolaanaya heshiis iskaashi oo ku saabsan taageerada Soomaaliya, sida ay sheegtay Wakaaladda wararka Anadolu.
Xildhibaannada Golaha Shacabka ee Turkiga ayaa cod aqlabiyad leh ku meel mariyay hindise sharciyeed, kaas oo oggolaanaya maalgelinta dhismaha Safaaradda Jamhuuriyadda Federaalka Soomaaliya ee Ankara.
Danjiraha Soomaaliya ee Turkiga, Fatxudiin Cali Maxamed ayaa goobjoog ka ahaa fadhiga codbixinta ee Golaha Shacabka. "Danjire Fatxudiin ayaa caawa goob-joog ka ahaa cod-bixin taariikhi ah oo ka dhacday Golaha Shacabka ee Jamhuuriyadda Türkiye, halkaas oo Xildhibaannadu ku ansixiyeen Hindise Sharciyeedka Lr. 220, kaas oo oggolaanaya maalgelinta dhismaha Safaaradda Jamhuuriyadda Federaalka Soomaaliya ee Ankara" ayaa lagu yiri qoraal kasoo baxay safaaradda kadib codeynta.
Danjiraha ayaa uga mahadceliyay xildhibaannada Turkiga taageeradooda mashruucan, isaga oo sheegay in uu ka tarjumayo xiriirka walaaltinimo, is-ixtiraam iyo iskaashi istiraatiiji ah oo sii xoogeysanaya ee ka dhexeeya Soomaaliya iyo Turkiga.
