Bangiga Afrika oo Jabuuti ka taageeraya dhismaha garoon cusub

Abidjan, 21 Febraayo 2026 (Dawan)– Dowladda Jabuuti ayaa ku dhawaaqday inay dammaanad-qaad rasmi ah ka heshay Bangiga Horumarka Afrika (AfDB), si uu bangigu u hoggaamiyo maalgelinta mashruuca Garoonka Caalamiga ah ee Al Haj Hassan Gouled Aptidon–Biidley International Airport, kaas oo ah mid ka mid ah mashaariicda ugu waaweyn ee laf-dhabarta u ah qorshaha horumarineed ee dalka ee “Vision 2035”.

Dammaanad-qaadkan ayaa lagu dhawaaqay Jimcihii kaddib wada-hadallo heer sare ah oo ka dhacay magaalada Abidjan, kuwaas oo dhex maray Guddoomiyaha Bangiga, Sidi Ould Tah, iyo Simon Mibrathu, oo ah Isku-duwaha Qaranka ee mashruucan. Bangiga ayaa xaqiijiyay inuu qaadan doono door firfircoon oo hoggaamineed si loo qaabeeyo nidaamka maaliyadeed iyo qaab-dhismeedka maalgelinta mashruuca.

Garoonkan cusub, oo qiyaastii 50 kiiloomitir u jira caasimadda Jabuuti, ayaa loogu talagalay inuu qaado ilaa 1.5 milyan oo rakaab ah iyo 100,000 tan oo xamuul ah sannadkii, taas oo si weyn uga badan awoodda garoonka hadda jira. Sidoo kale, bangigu wuxuu muujiyay inuu taageerayo mashaariic kale oo muhiim u ah hirgelinta garoonka, sida dhismaha waddada weyn ee RN18 iyo ku xirta garoonka khadka korontada qaranka.

Jabuuti, oo muddo dheer ahayd marin muhiim u ah badeecadaha u socda dalka Itoobiya isla markaana ay ku yaallaan saldhigyo ciidan oo dalal shisheeye leeyihiin, ayaa hiigsanaysa inay xoojiso doorkeeda istaraatiijiga ah ee isku xirka ganacsiga caalamiga ah. Mashruucan cusub wuxuu qayb ka yahay qorshe ballaaran oo ku kacaya qiyaastii 5 bilyan oo doollar, kaas oo lagu casriyeynayo adeegyada saadka iyo gaadiidka si loo xoojiyo isku xirnaanta Afrika, Bariga Dhexe, iyo Aasiya.

Sida ay werisay wakaaladda wararka Jabuuti (ADI), Bangiga Horumarka Afrika ayaa sidoo kale ka qaybgeli doona shir deeq-bixiyeyaal oo dhowaan la qaban doono, si loo soo afjaro xirmada guud ee maalgelinta mashruuca. Tallaabadan ayaa timid kaddib markii ay Jabuuti wadahadallo la yeelatay Sanduuqa Horumarinta Sacuudiga, si loo buuxiyo baahiyaha maaliyadeed ee haray.

Khubarada dhaqaalaha ayaa aaminsan in dhismaha garoonkan casriga ah uu si weyn u beddeli karo muuqaalka dhaqaalaha Jabuuti, isagoo kordhin doona awoodda ganacsiga, maalgashiga shisheeye, iyo tartanka gobolka ee dhinaca duulista iyo adeegyada saadka. Mashruucu wuxuu sidoo kale la jaanqaadayaa istaraatiijiyadda dalka ee ku aaddan inuu noqdo xarun ganacsi iyo gaadiid oo heer caalami ah, taas oo sare u qaadi karta kobaca dhaqaale iyo shaqo-abuurka mustaqbalka dhow iyo kan fogba.