Addis Ababa (Dawan)– Bangiga Qaranka Itoobiya ayaa go'aansaday inuu heerka dulsaarka sidiisa ku hayo 16%, xilli sicir-bararku weli ka sarreeyo bartilmaameedka bangiga, isla markaana la saadaalinayo inuu heer sare ku sii jiro lixda bilood ee soo socda.
Go'aanka ayaa la gaaray kaddib kulankii siddeedaad ee Guddiga Siyaasadda Lacagta ee bangiga, kaas oo dib u eegis ku sameeyey xaaladda sicir-bararka, koboca dhaqaalaha iyo horumarka qaybaha lacagta iyo maaliyadda. Bangigu wuxuu sidoo kale heerka dulsaarka ku xaddiday in kor iyo hoos loo beddeli karo saddex dhibcood oo boqolkiiba ah (±3%).
Bangigu wuxuu sheegay in sii wadidda siyaasadda lacagta ee adag ay lagama maarmaan u tahay xaqiijinta hadafkiisa muddada dhexe, kaas oo ah in sicir-bararka la dhimo lana gaarsiiyo heer ka hooseeya 10%.
Sicir-bararka Itoobiya ayaa bishii Sebtembar gaaray 14.9%. Bangigu wuxuu sheegay in sicir-bararku bilaabay inuu hoos uga soo dego heerkii ugu sarreeyey, balse uu weli si weyn uga sarreeyo bartilmaameedka la dejiyey.
Sicir-bararka cuntada ayaa wax yar hoos ugu dhacay 14.8%, marka loo eego 15.1% bishii Juun. Hase yeeshee, sicir-bararka badeecadaha aan cuntada ahayn ayaa kor u kacay, isagoo gaaray 15.1%, halka uu markii hore ahaa 12.2%.