Bangiga Horumarinta Bulshada oo Muqdisho laga daahfuray

Muqdisho (Dawan ) – Bangiga Horumarinta Bulshada ayaa maanta si rasmi ah looga daah-furay magaalada Muqdisho, taas oo sida ay sheegeen hoggaankiisa calaamad u ah horumar muhiim ah oo ku timid nidaamka maaliyadeed ee dalka.

Guddoomiyaha Bangiga, Cismaan Cali Cadde Xalane, ayaa caddeeyay kaalinta uu Bangigu ka qaadan doono bixinta adeegyo maaliyadeed oo casri ah oo dijitaal ah, kuwaas oo kor u qaadi doona tayada adeegyada bangiyada ee Soomaaliya.

Xalane ayaa sheegay in bangigu yahay mid bulshada ka yimid isla markaana u adeegaya bulshada, isagoo ballanqaaday inay kaalin weyn ka qaadan doonaan horumarinta dhaqaalaha dalka, gaar ahaan maalgelinta khayraadka gudaha.

Wuxuu xusay in bangigan muddo dheer la sugayay, isla markaana uu bulshada u keeni doono adeegyo bangiyeed oo casri ah, oo kor u qaadaya tayada adeegyada maaliyadeed.

"Waxaan ku soo biirnay bangiyada ka howlgala dalka. Bangigani waxa uu bulshada u keenayaa adeegyo casri ah oo digital ah, kuwaas oo kor u qaadi doona tayada adeegyada maaliyadeed. Waxaan dhiirrigelin doonaa maalgelinta khayraadka dalka, gaar ahaan dhinacyada beeraha iyo horumarinta wax-soo-saarka" ayuu yiri, Xalane

Furitaanka bangiga waxaa soo dhaweeyay Guddoomiyaha Bangiga Dhexe ee Soomaaliya, Cabdiraxmaan Maxamed Cabdullaahi, oo ku tilmaamay tallaabo muhiim ah oo muujinaysa horumarka sii kordhaya ee nidaamka maaliyadeed ee dalka. Waxa uu sidoo kale sheegay inay farxad u tahay in bangigu si rasmi ah ugu biiro bahda bangiyada ka howlgala Soomaaliya.

Guddoomiyaha ayaa yiri " Farxad weyn ayey noo tahay in maanta Bulsho Development Bank uu si rasmi ah ugu soo biiro bahda bangiyada dalka"

Daah-furka Bangiga Horumarinta Bulshada ayaa muujinaya horumar la taaban karo oo ku yimid kaabayaasha maaliyadeed ee dalka, waxaana la filayaa inuu fursado cusub u abuuro shacabka iyo ganacsiyada si ay u helaan adeegyo bangiyeed oo casri ah. Bangigu waxa uu sidoo kale kaalin muhiim ah ka qaadan doonaa kobcinta dhaqaalaha, gaar ahaan maalgelinta beeraha iyo wax-soo-saarka gudaha.