Jabuuti (Dawan)— Warshadda biyaha badda macaansaysa ee Doraleh ee dalka Jabuuti ayaa wejigeeda koowaad awood u leh inay maalintii soo saarto 22,500 mitir-kuyuub oo biyo la cabbi karo, taas oo qayb ka ah dadaallada dalkaasi uu wax kaga qabanayo yaraanta biyaha macaan.
Sida ay Jimcihii werisay Wakaaladda Wararka Jabuuti , agaasimayaasha shirkadaha biyaha ee toddoba dal oo ku yaalla Galbeedka iyo Bartamaha Afrika ayaa booqday warshadda. Mas’uuliyiinta ayaa ka kala socday Senegal, Niger, Togo, Côte d’Ivoire, Burkina Faso, Guinea iyo Cameroon. Booqashada oo ay qabanqaabisay Hay’adda Qaranka ee Biyaha iyo Fayadhowrka Jabuuti (ONEAD) ayaa diiradda lagu saaray farsamooyinka biyaha badda looga dhigo kuwo la cabbi karo iyo sidii loo xaqiijin lahaa helitaanka biyo nadiif ah oo waara.
Warshadda Doraleh ayaa adeegsata farsamada Reverse Osmosis, taas oo biyaha badda looga saaro milixda iyo walxaha kale. Biyaha ayaa mara dhowr marxaladood oo sifayn ah, ka hor inta aan la marin laba qaybood oo isticmaala farsamadan. Intaas kaddib, biyaha la sifeeyay ayaa loo gudbiyaa kaydka Farah Had, kaas oo warshadda ku xiran dhuun dhererkeedu yahay 10 kiiloomitir.