Muqdisho (Dawan) — Agaasimihii hore ee Hay’adda Sirdoonka iyo Nabadsugidda Qaranka (NISA), Fahad Yaasiin, ayaa soo bandhigay siddeed marxaladood oo uu sheegay inuu xiriirka Imaaraadka Carabta iyo Soomaaliya soo maray tan iyo 1991-kii. Wuxuu Imaaraadka ku eedeeyay inuu si tartiib ah uga soo gudbay dan la’aan, una gudbay faragelin siyaasadeed iyo isku day lagu ridayo dowladda Soomaaliya.
Qoraal uu ku baahiyay bartiisa X, ayuu Fahad Yaasiin ku sheegay in muddadii u dhexeysay 1991 iyo 2000, Imaaraadku uu Soomaaliya u muujiyay inuusan wax dan ka lahayn, marka laga reebo gargaar bani’aadannimo oo kooban iyo furitaanka fursadaha ganacsiga. Muddadii u dhexeysay 2001 iyo 2006, ayuu sheegay in dan la’aantaasi sii socotay, iyadoo lagu dhaqmayay mabda’a ah “dagaalka fursad sii.”
Eedeymaha ugu culus ee qoraalkiisa ayaa ku saabsan muddadii u dhexeysay 2007 iyo 2009. Fahad Yaasiin wuxuu sheegay in Imaaraadku bixiyay dhammaan miisaaniyaddii faragelintii militari ee Itoobiya, taas oo uu ku tilmaamay mid lagu doonayay in lagu rido Maxkamadihii Islaamiga. Wuxuu sheegay in faragelinta siyaasadeed ee tooska ahi ay bilaabatay muddadii u dhexeysay 2010 iyo 2014. Intii u dhexeysay 2014 iyo 2016, ayuu sheegay in Imaaraadku isku dayay inuu wiiqo midnimada dowladda dhexe iyo dowlad-goboleedyada, isagoo khilaaf ka dhex hurinayay hay’adaha dowladda federaalka.
Fahad Yaasiin ayaa Imaaraadka ku eedeeyay in muddadii u dhexeysay 2017 iyo 2022 uu isku dayay inuu rido dowladda oo dhan, isagoo adeegsanayay khilaafaadka ka dhex jiray dowladda dhexe, isla markaana dowladda federaalka u adeegsanayay weerarrada ka dhanka ah dowlad-goboleedyada. Muddadan ayaa ku beegnayd xilligii Madaxweyne Maxamed Cabdullaahi Farmaajo, markaas oo Fahad Yaasiin uu ka mid ahaa xubnihii ugu awoodda badnaa dowladda.