Kigali (Dawan) - Bangiga Dhexe ee Soomaaliya iyo Bangiga Qaranka Rwanda ayaa magaalada Kigali ku kala saxiixday heshiis is-afgarad (MoU) oo lagu xoojinayo iskaashiga iyo wada-shaqeynta dhinacyada maaliyadda. Heshiiska waxaa Soomaaliya u saxiixay Guddoomiyaha Bangiga Dhexe, Cabdiraxmaan Maxamed Cabdullaahi, iyadoo ay goob joog ka ahaayeen Guddoomiye Ku-xigeenka Bangiga iyo xubno ka tirsan guddiga maamulka.
Sida lagu sheegay war kasoo baxay Bangiga Dhexe ee Soomaaliya, heshiisku wuxuu qayb ka yahay dadaallada lagu dhisayo nidaam maaliyadeed oo hufan, adkaysi leh oo lagu kalsoonaan karo.
Heshiiskan is-afgaradka ah ayaa dhigaya in labada dhinac ay iska kaashadaan hal-abuurka dhijitaalka ah iyo horumarinta tignoolajiyadda maaliyadeed, xoojinta kormeerka hay’adaha maaliyadeed iyo u hoggaansanaanta shuruucda la-dagaallanka lacag-dhaqista iyo maalgelinta argagixisada (AML/CFT).
