Muqdisho (Dawan)- La-taliyaha Amniga Qaranka Soomaaliya, Aweys Xaaji Yuusuf, ayaa Imaaraadka Carabta ku eedeeyey inuu si sharci-darro ah Soomaaliya uga dhoofinayey kheyraadka dabiiciga ah, gaar ahaan macdanta iyo dahabka, taas oo kusoo biirtay khilaafka sii xoogeysanaya ee u dhexeeya Muqdisho iyo Abu Dhabi. Qoraal uu 19-kii Nofeembar ku baahiyey baraha bulshada ayuu Yuusuf ku sheegay in Imaaraadku ku lug lahaa dhoofinta sharci-darrada ah ee kheyraadka dabiiciga ah ee Soomaaliya.
“Dhoofinta sharci-darrada ah ee kheyraadka dabiiciga ah ee Soomaaliya, gaar ahaan macdanta iyo dahabka, ayuu Imaaraadku ku lug lahaa,” ayuu ku yiri qoraalkiisa La-taliyaha Amniga Qaranka.
Hase yeeshee, La-taliyaha Amniga Qaranka ma uusan sheegin goobaha gaarka ah ee la sheegay in kheyraadkan laga soo saaray ama laga dhoofiyey. Sidoo kale, ma uusan bixin faahfaahin ku saabsan xaddiga kheyraadka la dhoofiyey ama shirkadaha iyo shakhsiyaadka arrintan ku lugta leh.
Eedeyntan ayaa timid kaddib khudbad uu jeediyey Madaxweyne Xasan Sheekh Maxamuud, kaas oo Imaaraadka ku eedeeyey inuu wiiqayo midnimada qaranka iyo madax-bannaanida Soomaaliya. Hadalka madaxweynaha ayaa kusoo beegmay xilli ay sii kordhayeen tabashooyinka dowladda Soomaaliya ee la xiriira howlaha Imaaraadka iyo xiriirka uu la leeyahay dhinacyo kala duwan oo siyaasadeed iyo maamul oo dalka ka jira.