Bankiyada Itoobiya oo ku xiray adeegyadooda aqoonsi dijitaal ah

Addis Ababa 19 Diseembar 2025 (Dawan)— Bankiyada Itoobiya ayaa bilaabay hirgelinta shuruudo cusub oo ku xiran sii wadista adeegyada bankiyeed, kadib markii lagu waajibiyay macaamiisha in akoonnadooda lagu xiro aqoonsiga qaranka ee dijitaalka ah, taas oo lagu sheegay tallaabo lagu xoojinayo amniga iyo nidaamka maaliyadeed ee dalka.

Bankiga Ganacsiga Itoobiya ayaa bayaan rasmi ah ku shaaciyay in macaamiisha aan ku xirin akoonnadooda aqoonsi dijitaal ah oo ansax ah, gaar ahaan nidaamka loo yaqaan “Faida”, aysan awoodi doonin inay sii helaan adeegyada bankiyada marka ay dhammaadaan waqtiyada kama dambaysta ah ee loo qabtay.

Bankigu waxa uu sheegay in macaamiisha looga baahan yahay inay tagaan laamaha bankiyada, ayna la wadaagan lambarka aqoonsiga dijitaalka ah si loogu xiro akoonnadooda, iyada oo macaamiisha looga digay inay ak dhega adeegaan fulinta shurudahan taas oo o keeni karta in la hakiyo adeegyada muhiimka ah sida dhigista lacagaha, la bixinta, wareejinta iyo dhammaan macaamillada kale ee bankiyada.

Sida lagu sheegay bayaanka, fulinta go’aankan waxay noqon doontaa mid marxalado ah, hase yeeshee si buuxda ayuu u dhaqan geli doonaa laga bilaabo 10-ka Janaayo 2026. Bangiyadu waxay ugu baaqeen macaamiisha inay si degdeg ah u dhammeystiraan diiwaangelinta looga baahan yahay si aysan u la kulmin carqalad ku timaadda adeegyadooda maaliyadeed.

Go’aankan ayaa ku saleysan awaamiir ka soo baxay Bankiga Qaranka Itoobiya, kaas oo 4-tii Diseembar 2025 faray dhammaan hay’adaha maaliyadeed in ay mideeyaan xogta macaamiisha, iyaga oo adeegsanaya nidaamka aqoonsiga qaranka ee dijitaalka ah.

Bankiga Qaranka Itoobiya ayaa sheegay in tallaabadan ay qeyb ka tahay qorshe qaran oo ballaaran oo lagu doonayo in si buuxda loo hirgeliyo adeegyada aqoonsiga dijitaalka ah ee waaxda maaliyadda marka la gaaro sanadka 2030, si loo xoojiyo amniga, loona horumariyo tayada adeegyada, isla markaana la dhiso nidaam maaliyadeed oo dijitaal ah oo mideysan dalka oo dhan.