Muqdisho (Dawan)- Magaalooyin badan oo ka tirsan Jamhuuriyadda Federaalka Soomaaliya ayaa maanta lagu qabtay bannaanbaxyo ballaaran oo looga soo horjeeday aqoonsiga ay Israa’iil siisay Somaliland, iyadoo dibadbaxyadu ay noqdeen kuwo si weyn uga tarjumayay dareenka shacabka Soomaaliyeed ee ku aaddan ilaalinta midnimada iyo madax-bannaanida dhuleed ee dalka.
Magaalooyinka ay ka dhaceen bannaanbaxyada waxaa ka mid ahaa Muqdisho, Buuhoodle, Gaalkacyo, Guriceel, Xudur, Boorame, Marko, Baxdo, Baydhabo, Caabudwaaq, Dhuusamreeb, Cadaado, Hobyo, Laascaanood, iyo Xarardheere. Dibadbaxayaasha ayaa watay calanka Soomaaliya, iyagoo ku dhawaaqaya hal-ku-dhigyo muujinayay in Soomaaliya tahay dal kaliya oo leh xuduudo caalami ah oo la aqoonsan yahay, isla markaana aan la aqbali karin faragelin kasta oo shisheeye iyo kala qeybinta dhulka Soomaaliyeed.
