Ku dhawaad kun arday oo baratay xirfadaha farsamada gacanta, waxsoosaarka beeraha, iyo xanaanada xoolaha oo maanta ka qalin jabiyay kuliyada xirfadaha kala duwan ee Dhagaxbuur.
Xaflad ka dhacay magaalada Dhagaxbuur ee gobolka Jarar ee Dowlad Deegaanka Soomaalida ayaa waxaa ka qalin jabiyay 937 arday oo baratay culuumta xirfadaha kala duwan ee ay bixiso kuliyada xirfadaha kala duwan ee Dhagaxbuur ee barashada xanaanada xoolaha, waxsoosaarka beeraha, biyaha, computerka, maaraynta khayraadka dabiiciga, harqaanka, qurxinta dumarka, qaybaha makaanikada iyo korontada.
Xafladan qalinjabinta ah ayaa waxaa ka soo qaybgalay Wasiirka Xafiiska Xirfadaha iyo Shaqo-abuurka dowlad deegaanka Xuseen Gaydh iyo Wasiir kuxigeenka Xafiiska Xirfadaha iyo Shaqo-abuurka Dowlad deegaanka Cabdiqaadir Maxamed Shugri iyo qaar ka mid ah masuuliyiinta gobolka Jarar iyo maamulka magaalada Dhagaxbuur.