Barnaamij lagu hormarinayo xirfadaha dhallinyarada Soomaaliyeed oo Addis Ababa laga daahfuray

Addis Ababa (Dawan ) – LG, Hay’adda Iskaashiga Caalamiga ah ee Kuuriya ( KOICA), xafiiska UNDP ee Soomaaliya iyo xarunta nabadda ee Elman ayaa manata oo Talaado ah magaalada Addis Ababa ka daahfuray iskaashi lagu taageerayo horumarinta xirfadaha iyo nabad-dhisidda Soomaaliya.

Hindisahan ayaa abuuri doona fursado nololeed oo loogu talagalay dhallinyarada Soomaaliyeed, iyadoo loo marayo waxbarashada farsamada iyo xirfadaha shaqo, isla markaana lagu xoojinayo adkeysiga iyo horumarinta dhaqaalaha bulshooyinka ay saameeyeen colaadaha.

Iskaashigan ayaa ka duulaya khibradda Kulliyadda Farsamada iyo Tababarka Xirfadeed ee LG-KOICA Hope ee Addis Ababa, waxaana lagu dhisi doonaa xarun tababar farsamo iyo adeeg oo waafaqsan heerarka caalamiga ah, taas oo UNDP iyo KOICA ay ka hirgelin doonaan xarunta Xarunta Nabadda Elman ee Muqdisho.

Kooxdii ugu horreysay ee tababarayaasha xarunta Elman ayaa tababar, isbarbardhig xirfadeed ka heli doona LG-KOICA Hope TVET College. Kadib waxay tababari doonaan dhallinyaro Soomaaliyeed oo lagu barayo dayactirka qalabka korontada, ICT-ga, gaar ahaan qalabka kombiyuutarrada iyo isku-xirka shabakadaha, ganacsiga, iyo xirfadaha nolosha.

Dhallinyarada ka qalinjabisa barnaamijka ayaa loo abuuri doona fursado shaqo, iyadoo loo marayo carwooyin shaqo, tababaro shaqo-barasho, taageero ganacsi iyo shabakadaha qaybinta iyo adeegga ee LG ku leedahay Soomaaliya.

Wakiilka xafiiska UNDP ee Soomaaliya, Lionel Laurens, ayaa sheegay in iskaashigani isku xirayo horumarinta xirfadaha, ka-qaybgalka ganacsiga gaarka loo leeyahay iyo nabad-dhisidda.

“Barnaamijkan waa maalgashi istiraatiiji ah oo lagu sameynayo mustaqbalka Soomaaliya. Hantida ugu weyn ee Soomaaliya waa dhallinyaradeeda — hibadooda, adkeysigooda iyo hal-abuurkooda,” ayuu yiri Laurens.

Madaxa Laanta LG ee Itoobiya, Seunghwan Yang, ayaa sheegay in shirkaddu Soomaaliya u gudbin doonto khibradda LG-KOICA Hope TVET College, oo Itoobiya ka shaqeynayay muddo 13 sano ah.

“Barnaamijkan, waxaan ku taageeri doonnaa dhallinyarada nugul ee Afrika si ay u gaaraan isku-filnaansho, una noqdaan xirfadlayaal ka qayb qaata horumarka qaranka,” ayuu yiri Yang.

Xarunta Elman ayaa hoggaamin doonta hirgelinta barnaamijka gudaha Soomaaliya, iyadoo ballaarin doonta tababarrada farsamada, isla markaana qalinjabiyeyaasha si toos ah ugu xiri doonta loo-shaqeeyayaasha.

“Soomaaliya mar walba waxay ahayd dal ay leeyihiin dhiseyaal, ganacsato iyo hal-abuurayaal, balse dhallinyaro badan ayaa weli ka maqan dhaqaalaha casriga ah,” ayay tiri Ilwad Elman, Madaxa Hawlgalka ee xarunta nabadda ee Elman, iyada oo intaas ku dartay in “Iskaashigan wuxuu gacan ka geysan doonaa dhisidda nidaamyo, heerar iyo khibrado maxalli ah oo dhallinyarada Soomaaliyeed u suurtagelinaya inay ka qayb noqdaan shaqooyinka iyo dhaqaalaha adeegyada mustaqbalka.”

Agaasimaha KOICA ee gobolka , Wankyu Park, ayaa iskaashigan ku tilmaamay hannaan guul u ah dhammaan dhinacyada, kaas oo mideynaya hay’ad Qaramada Midoobay ka tirsan, ganacsiga gaarka loo leeyahay iyo urur bulsho oo maxalli ah.

Iskaashigan ayaa ujeedkiisu yahay in la abuuro shaqooyin, la horumariyo xirfado, laguna wajahayo sababaha asaasiga ah ee keena nuglaanta bulshada, iyadoo dhallinyarada Soomaaliyeed loo abuurayo waddooyin ay ku helaan nolol sharaf leh.