Baydhabo oo laga dhigay bannaanbaxyo ka dhan ah diidmada Shillinka Soomaaliga

Baydhabo (Dawan) – Bannaanbaxyo xooggan ayaa aroortii hore ee saakay ka qarxay magaalada Baydhabo, kadib markii dadweyne careysan ay waddooyinka isugu soo baxeen, iyagoo ka soo horjeestay ganacsato lagu eedeeyay inay diideen qaadashada lacagta Shilling Soomaaliga.

Dibadbaxyadan, oo lagu tilmaamay kuwii ugu xooganaa ee waayadan ka dhaca magaalada ayaa lagu arkay dad badan oo isugu soo baxay waddooyinka waaweyn, kuwaas oo ku dhawaaqayay hal-ku-dhigyo ku aaddan in la dhaqan geliyo isticmaalka lacagta qaranka.

Dadweynaha ayaa sheegay in bannaanbaxyadu ay ka dhasheen cabashooyin la xiriira in ganacsato iyo sarifleyaal qaarkood ay diideen aqbalidda Shillinka Soomaaliga, taas oo caqabad ku noqotay helitaanka badeecooyinka iyo adeegyada aasaasiga ah, gaar ahaan dadka danyarta ah ee ku tiirsan lacagtaas.

Mid ka mid ah dadka bannaanbaxa ka qeyb galay ayaa yiri: “Lacagtaan shalay ma ahayn, daraad ayay shaqeyneysay, ilaa haddana wax baa lagu gadan la’yahay—caqli gal miyaa? Caqli ayaa loo baahan yahay. Anigu maanta ma shaqeyn karo, dhibka na haysta waa weyn yahay.”

Ilo deegaanka ah ayaa xaqiijiyay in ciidamada ammaanka la geeyay qaybo ka mid ah magaalada si ay ula socdaan xaaladda, inkastoo aan weli la soo sheegin rabshado waaweyn oo khasaare geystay.

Dhanka kale, ganacsiyada yar-yar ee magaalada ayaa sheegay inay la kulmeen culeys dhaqaale, iyagoo xusay inay lumiyeen qeyb ka mid ah macaamiishooda ku tiirsanaa Shillinka Soomaaliga, taas oo saameyn ku yeelatay iibkooda maalinlaha ah.

Haweeney ka mid ah ganacsatada suuqa, oo iibisa yaanyo, ayaa sheegtay in xaaladdu ay si toos ah u saameysay ganacsigeeda, iyadoo tilmaantay hoos u dhac ku yimid iibka iyo dhaqdhaqaaqa suuqa.

Bannaanbaxyada ka socda Baydhabo ayaa imanaya xilli magaalooyin kale oo dalka ka mid ah ay ka soo baxayaan cabashooyin la mid ah oo ku saabsan diidmada lacagta Shillinka Soomaaliga, taas oo sare u qaaday walaaca la xiriira xasilloonida lacageed iyo kalsoonida dadweynaha.

Mas’uuliyiinta Muqdisho ayaa dhowaan ka dhawaaqay in diidmada lacagta Shillinka Soomaaliga loo aqoonsan yahay fal dambiyeed, taas oo qeyb ka ah dadaallada lagu xoojinayo isticmaalka lacagta qaranka. Maamulada kale sida Jowhar ayaa sidoo kale soo saaray go’aamo la mid ah kuwa Gobolka Banaadir ee ku saabsan waajibinta aqbalidda Shillinka.

Khabiirada dhaqaalaha ayaa sheegaya in ku tiirsanaanta lacagaha qalaad, gaar ahaan doolarka Mareykanka, inay muujinayso caqabado qoto dheer oo ka jira nidaamka maaliyadeed ee Soomaaliya, oo ay ka mid yihiin walaaca sicir-bararka iyo daciifnimada fulinta sharciyada.