Baydhabo (Dawan) – Hay’adda Maareynta Musiibooyinka Qaranka (SODMA) ayaa maanta sheegtay in gargaar raashin ah u qeybisay 500 oo qoys oo isugu jira danyar, barakacayaal, iyo dadka nugul ee ku nool magaalada Baydhabo, kuwaas oo si weyn ay u saameeyay abaarta ka jirta dalka.
Gargaarka la qeybiyay ayaa ahaa mid dhameystiran, waxaana uu ka koobnaa cuntooyin daruuri ah sida bur, bariis, iyo saliid, kuwaas oo loogu talagalay in lagu yareeyo xaaladaha nololeed ee adag ee ay wajahayaan qoysaska nugul.
Munaasabadda qaybinta raashiinka waxaa goob-joog ka ahaa Guddoomiyaha Hay’adda SODMA, Maxamuud Macalin Cabdulle, Wasiirka Gargaarka ee Dowlad Goboleedka Koonfur Galbeed Soomaaliya, iyo masuuliyiin kale oo ka tirsan maamulka gobolka, kuwaas oo kormeeray habsami u socodka howlaha gargaarka.
