Muqdisho (Dawan) – Dowladda Soomaaliya ayaa billowday tababar ku saabsan hababka beerashada casriga ah ee la jaanqaadaya isbeddelka cimilada, iyadoo la doonayo in kor loo qaado wax-soo-saarka dalagyada iyo adkeysiga beeraleyda, sida ay sheegtay Wasaaradda Beeraha iyo Waraabka.
Agaasimaha Guud ee wasaaradda, Maxamed Xasan Cabdulle, ayaa Arbacadii furay tababarka oo ay soo qaban-qaabisay Waaxda Wax-soo-saarka Dalagyada iyo Sugnaanta Cuntada, sida lagu sheegay bayaan ka soo baxay wasaaradda.
Tababarkan ayaa ku soo beegmaya xilliga Gu’ga, oo muhiim u ah wax-soo-saarka beeraha Soomaaliya, waxaana diiradda lagu saaray isticmaalka farsamooyin casri ah si wax looga qabto caqabadaha ay beeraleydu la kulmaan, oo ay ka mid yihiin roobab aan joogto ahayn, nabaad-guurka dhulka iyo yaraanta agabka beeraha.
