Dahabshiil oo Sheegtay in Haweenku Ragga Kaga Badan Yihiin Lacagaha Dibadda laga Soo Diro

“Lacagaha dibadda laga soo diro, 60% ama 70% waxaa ugu badan hablaha wax soo dira,” ayuu yiri Ducaale, isaga oo intaas ku daray in haweenka ku nool qurbaha ay ragga kaga horreeyaan lacagaha ay u soo diraan dalka.

Hadalkan ayaa imanaya xilli lacagaha ay qurbe-joogtu u soo diraan Soomaaliya ay yihiin mid ka mid ah ilaha ugu waaweyn ee dhaqaalaha dalka. Sida uu sheegay Bangiga Dhexe ee Soomaaliya, lacagaha shakhsiga ah ee qoysaska loo soo diro ayaa gaaray 3.13 bilyan oo doollar, taas oo u dhiganta 24% wax-soo-saarka guud ee dalka (GDP). Lacagahaasi waxay sidoo kale ka mid yihiin ilaha ugu waaweyn uguna xasilloon ee dhaqaalaha dalka soo gala.