Beledweyn oo laga cabsi qabo in ay ku dhuftaan fatahaado xooggan

Beledweyn (Dawan) – Magaalada Beledweyn ee gobolka Hiiraan ayaa wajahaysa khatarta ugu sareysa ee fatahaadda wabiga Shabeelle kadib markii heerka biyaha wabiga uu dhaafay heerka digniinta fatahaadda dhexdhexaadka ah, sida lagu sheegay warbixin kasoo baxday FAO SWALIM.

FAO SWALIM, oo ah mashruuca maareynta macluumaadka biyaha iyo dhulka Soomaaliya ee ay maamusho Hay’adda Qaramada Midoobay u qaabilsan Cuntada iyo Beeraha (FAO), ayaa bixiya digniinaha fatahaadaha, xogta roobabka iyo la socodka xaaladaha wabiyada Soomaaliya.

Warbixinta digniinta fatahaadda ee la soo saaray Isniintii ayaa sheegtay in heerka biyaha wabiga ee Beledweyne uu gaaray 6.75 mitir, taas oo 0.25 mitir ka sarreysa heerka digniinta fatahaadda dhexdhexaadka ah ee ah 6.50 mitir.

SWALIM ayaa sheegtay in heerka biyaha uu kor u kacay 0.55 mitir toddobaadkii la soo dhaafay, isla markaana uu hadda ka sarreeyo 1.01 mitir marka loo eego isla muddadan sanadkii 2025 iyo 1.14 mitir marka loo eego celceliska muddada dheer.

Warbixinta ayaa sidoo kale sheegtay in heerarka biyaha ay sii kordhayaan magaalooyinka hoose ee wabiga, oo ay kamid yihiin Buulo Burte, Jowhar, Balcad iyo Afgooye, iyadoo Jowhar uu gaaray 4.88 mitir oo kaliya 0.12 mitir ka hooseeya heerka digniinta fatahaadda.

Hay’addu waxay sheegtay in roobabkii dhawaan ka da’ay gudaha Soomaaliya iyo dhulka sare ee Itoobiya ay sabab u noqdeen kororka joogtada ah ee heerarka biyaha wabiga Shabeelle.

SWALIM ayaa ka digtay in roobab dheeraad ah oo la saadaaliyay inay ka da’aan Hiiraan, Shabeellaha Dhexe, Banaadir iyo Shabeellaha Hoose, iyo sidoo kale dhulka sare ee Itoobiya, ay sii kordhin karaan khatarta fatahaadaha wabiga, gaar ahaan meelaha hoose iyo goobaha ay jiinka wabigu jilicsan yihiin.

Warbixinta ayaa sheegtay in fatahaadaha ay sababi karaan barakac, carqalad ku timaada isku socodka iyo suuqyada, waxyeello gaarta beeraha, hoyga dadka iyo ceelasha biyaha, iyo sidoo kale khataro caafimaad oo la xiriira biyaha fadhiisiga.

FAO SWALIM iyo hay’adaha maareynta musiibooyinka ayaa ugu baaqay bulshada ku nool hareeraha wabiga inay ka fogaadaan goobaha fatahaaddu ay saameyn karaan, isla markaana ay la socdaan digniinaha iyo fariimaha rasmiga ah ee kasoo baxaya hay’adaha dowladda iyo kuwa gargaarka.

Beledweyne ayaa kamid ah magaalooyinka ugu nugul fatahaadaha Soomaaliya, halkaas oo kumannaan qoys ay ku nool yihiin xaafado hoose oo u dhow wabiga Shabeelle.