Muqdisho (Dawan)— Isbitaalka Dr. Sumait ayaa magaalada Muqdisho ku qabtay munaasabad lagu xusay Maalinta Caalamiga ah ee Raajada. Munaasabadda ayaa lagu soo bandhigay kaalinta baaritaannada raajadu ku leeyihiin ogaanshaha cudurrada iyo go'aaminta daryeelka ku habboon bukaanka.
Xuska waxaa ka qaybgalay dhakhaatiir iyo xirfadlayaal caafimaad oo ku takhasusay raajada, macallimiin jaamacadeed, qalin-jabiyayaal iyo wakiillo ka socday xarumaha baaritaannada caafimaadka ee Muqdisho.
Dr. Cumar Xasan, oo ah dhakhtar ku takhasusay raajada kana tirsan Isbitaalka Dr. Sumait, ayaa furay munaasabadda. Waxa uu ka hadlay sida raajadu dhakhaatiirta uga caawiso qiimaynta xaaladda bukaanka, ogaanshaha cudurrada iyo qorshaynta daryeelka ku habboon.