Booliska oo ka warbixiyay xaaladda amni ee Muqdisho

Muqdisho (Dawan) – Taliska Ciidanka Booliska Soomaaliyeed ayaa sheegay in aan Muqdisho laga diiwaangelin wax falal argagixiso ah toddobaadyadii u dambeeyay, sida lagu sheegay warbixin lagu soo bandhigay shirkii toddobaadlaha ahaa ee Taliska Booliska Khamiistii.

Afhayeenka Ciidanka Booliska Soomaaliyeed, Cabdifitaax Aadan, ayaa sheegay in warbixin uu shirka ka jeediyay Taliyaha Qaybta Guud ee Booliska Gobolka Banaadir lagu xaqiijiyay in xaaladda amniga caasimaddu ay degganeyd muddooyinkii u dambeeyay.

“Waxaa la xaqiijiyay in toddobaadyadii la soo dhaafay aysan jirin wax falal argagixiso ah oo laga diiwaangeliyay caasimadda,” ayuu yiri afhayeenku.

Sidoo kale, shirka ayaa lagu dhageystay warbixinno ku saabsan howlgallada la dagaallanka argagixisada iyo baaritaannada dambiyada, iyadoo talisyada amniga ay sheegeen in ay socdaan baaritaanno la xiriira howlgallo la fuliyay toddobaadkii la soo dhaafay.

Intii uu socday kulanka, Taliyaha Ciidanka Booliska Soomaaliyeed ayaa soo saaray amarro cusub oo la xiriira maamulka gaadiidka booliska. Taliska ayaa mamnuucay in gaadiidka booliska lagu dayactiro ama la geeyo garaashyo gaar loo leeyahay.

Booliska ayaa uga digay milkiilayaasha garaashyada iyo farsamayaqaannada ku sugan Muqdisho in aysan qaabili karin ama cilad-bixin ku sameyn karin gaadiidka ay leeyihiin ciidamada booliska, isagoo sheegay in tallaabo sharci ah laga qaadi doono cid kasta oo ku xadgudubta amarkaasi.

Shirka ayaa sidoo kale looga hadlay waxa boolisku ku tilmaamay kororka waxyaabaha anshax-xumada ah ee lagu baahiyo baraha bulshada. Afhayeenka booliska ayaa sheegay in taliyuhu amar ku bixiyay in la xoojiyo la socodka arrimahaas, isla markaana tallaabo sharci ah laga qaado dadka lagu helo falal ka hor imanaya sharciga.

Booliska Soomaaliya ayaa marar badan sheegay inay sare u qaadeen howlgallada amniga ee Muqdisho iyo deegaannada ku dhow si looga hortago weerarrada ay geystaan kooxaha hubeysan.