Booliska Somaliland oo xaqiijiyay in bangiga dhexe ee Boorama la gubay.

5 Diseembar 2025 (Dawan)Taliyaha Ciidanka Booliska Somaliland Sarreeye Guuto Cabdiraxmaan Cabdullaahi Xasan ayaa sheegay banaanbaxyadi xalay ilaa saakay ka socday Boorama lagu gubay weerarna lagu qaaday bangiga dhexe ee Boorama.

Taliyaha ayaa sheegay in ciidanka booliska aysan u dulqaadan doonin banaanbaxyada rabshadaha wato isla markaana ay ka hor tagi doonaan, amaankana sida ugu adag ay uga howl gali doonaan.

“dadka woo mudaharaadi karaa, lakin in Hantida la guda mahan, ciidamada amaanka arintaas u dul qaadan maayaan, gacan bir ah ayaa lagu qabanayaa, cidna ugu dulqaadan meyno, waxaa ku dhex jira dad boobaya hantida dadweynaha kama yeeleyno, dad bangiga umadda dab ku shidaya” ayuu yiri Cabdiraxmaan Cabdullaahi Xasan.

Taliyaha ayaa sheegay in ay jiraan dad ku soo dhex dhuuntay banaanbaxayaasha isla markaana dhibaata u geysanaya ciidanka iyo hantida dadweynaha, kuwaasna ay gacan ku dhigi doonaan laamaha amaanka Somaliland.

Booliska ma sheegin khasaaro naf ah oo ka dhashay banaanbaxayada, kan hantida inta uu la egyahay wali ma uusan sheegin.

Dibad baxyadaan ayaa salka ku haya diidmo ay bulshada ka qabaan munaasabad xeer-ciise oo dhawaan ay aqoonsatay hay’adda UNESCO, kaas oo shalay galankii danbe, wasiirka wasaaradda warfaafinta Somaliland Axmed Yaasiin Sheekh Cali uu sheegay in xafladda xeer-ciise lagu qabanayo magaaladda Saylac ee gobolka Awday.