Muqdisho, 9 Janaayo 2026 (Dawan)- Booqasho si weyn loo sugayay oo uu Wasiirka Arrimaha Dibadda Shiinaha, Wang Yi, ku imaan lahaa caasimadda Soomaaliya ee Muqdisho ayaa si lama filaan ah u baaqatay daqiiqadihii ugu dambeeyay, iyadoo aan la shaacin sabab rasmi ah oo ka dambeysa baajintaas.
Wasaaradda Arrimaha Dibadda Soomaaliya ayaa u xaqiijisay Dawan Media in diblomaasiga sare ee Shiinaha uusan maanta imaan doonin Muqdisho, inkastoo booqashadaasi horey si buuxda loogu diyaargaroobay. Ilaa iyo hadda, ma jirto faahfaahin rasmi ah oo ku saabsan sababta keentay go’aanka degdegga ah.
Baajinta booqashada ayaa kusoo beegantay xilli caasimadda Muqdisho lagu soo rogay xaalad amni oo adag, iyadoo tan iyo waaberigii la xiray waddooyin muhiim ah, isla markaana ciidamo boolis iyo milatari lagu arkayay isgoysyada waaweyn. Xayiraadahaas ayaa si gaar ah uga jirtay waddooyinka gala iyo kuwa ka baxa Garoonka Caalamiga ah ee Aadan Cadde, kuwaas oo loogu talagalay soo dhoweynta wafdiga Shiinaha.
Booqashadan la baajiyay ayaa la filayay inay noqoto tii ugu horreysay ee wasiir arrimo dibadeed oo Shiine ah ku yimaado Soomaaliya muddo tobannaan sano ah, isla markaana lagu xoojinayo xiriirka diblomaasiyadeed iyo iskaashiga labada dal.
