Bulshada Rayidka oo ku baaqday in dib loogu laabto wadahadallada siyaasadeed

Muqdisho (Dawan) – Dalladda Bulshada Rayidka Soomaaliyeed ee SONSA ayaa ku baaqday in dib loogu laabto wada-hadallada siyaasadeed kadib markii wada-hadalladii u dhexeeyay Dowladda Federaalka Soomaaliya iyo Golaha Mustaqbalka Soomaaliyeed ay kusoo dhammaadeen natiijo la’aan, sida lagu sheegay war-saxaafadeed kasoo baxay Dalladda.

Wadahadalladan oo ka dhacay Muqdisho intii u dhexeysay 13-ka ilaa 15-ka May 2026 ayaa looga hadlayay arrimaha siyaasadda, doorashooyinka iyo khilaafaadka ka taagan geeddi-socodka dowlad-dhiska Soomaaliya.

Dalladda SONSA ayaa ugu baaqday dhammaan hoggaamiyeyaasha siyaasadda inay muujiyaan masuuliyad, biseyl siyaasadeed iyo tanaasul dhab ah si loo gaaro xal waara oo lagu hormarinayo danta shacabka Soomaaliyeed.

“Bulshada Rayidka Soomaaliyeed waxay adkaynaysaa in wada-hadal dhab ah iyo midnimo qaran ay yihiin waddada keliya ee lagu ilaalin karo nabadda, xasilloonida iyo dowlad-dhiska Soomaaliya,” ayaa lagu yiri war-saxaafadeedka.

SONSA ayaa sidoo kale sheegtay in xaaladda siyaasadeed ee dalka ay u baahan tahay in dhinacyadu ka hormariyaan danta guud khilaafaadka siyaasadeed, si looga fogaado xaalado halis gelin kara xasilloonida dalka.

Dalladdu waxay ugu dambeyn ugu baaqday dowladda, mucaaradka iyo dhammaan daneeyayaasha siyaasadda inay sii wadaan wada-hadallada isla markaana la ilaaliyo midnimada iyo wadajirka shacabka Soomaaliyeed.