Muqdisho (Dawan)– Wasiirka Dekedaha iyo Gaadiidka Badda Soomaaliya, Cabdulqaadir Maxamed Nuur “Jaamac”, ayaa maanta oo Isniin ah loo doortay Guddoomiyaha Golaha Shacabka, kaddib markii uu helay 142 cod, isagoo ka adkaaday musharraxii la tartamayey ee Cabdulqaadir Cumar Macallin “Daada”, oo helay 30 cod.
Laba cod ayaa noqday kuwo aan ansax ahayn, sida ay sheegtay Guddoomiyaha Ku-meelgaarka ah ahna gudoomiye ku xigeenka koowaad ee Golaha Shacabka, Saadiya Yaasiin, kaddib markii codbixintu soo dhammaatay.
Khudbaddiisa guusha, Jaamac ayaa uga mahadceliyay xildhibaannadii taageeray iyo kuwii codkooda siiyay musharraxa la tartamayey, isagoo sheegay inuu u shaqeyn doono dhammaan xubnaha baarlamaanka.
Jamac ayaa sheegay inuu iska casilay xilkii uu ka hayay dowladda iyo ururkiisii siyaasadeed, kaddib doorashadiisa, isagoo xusay in dastuurka iyo xeerarka baarlamaanku ay guddoomiyaha Golaha Shacabka ka doonayaan inuu ilaaliyo dhexdhexaadnimada siyaasadeed.
Waxa uu sidoo kale ballanqaaday inuu la xiriiri doono xildhibaannada ka maqnaanaya baarlamaanka sababo la xiriira tabashooyin siyaasadeed, isla markaana uu la shaqeyn doono guddoomiye-ku-xigeennada iyo guddiyada baarlamaanka si wax looga qabto tabashooyinkooda.
