Caro ka dhalatay darawal lagu dilay Gaarisa

Hay'adaha u dooda xuquuqda aadanaha ayaa dhankooda ku baaqay in si degdeg ah maxkamad loo soo taago saraakiisha ku lugta leh dilka Axmed, si qoyskii uu ka baxay ay u helaan caddaalad meeshana ay uga baxdo in laamaha amnigu ay iska sameeyeen waxa ay doonaan.

Guddoomiyaha Shabakadda Xuquuqda Aadanaha ee Gaarisa, Mukhtaar Daahir, ayaa sheegay in boolisku muddo dheer ku kacayeen dilal iyo dhibaateyn loo geysto dad rayid ah, iyada oo aan wax xisaabtan ah la sameyn.

“Tani waxay noqotay dhaqan ay boolisku ku dilaan dad aan waxba galabsan. Shaqadoodu waa inay xiraan eedeysanayaasha oo maxkamad la hor geeyo, annaguna waxaan ku baaqeynaa baaritaan degdeg ah. Dadka ku lugta leh dhacdadan, waa in si degdeg ah maxkamad loo hor keenaa,” ayuu yiri Mukhtaar Daahir.

Dhacdadan ayaa sare u qaaday walaaca bulshada iyo baahida loo qabo in booliska lagula xisaabtamo falalkooda ka dhanka ah rayidka, waxaana la filaya in baaritaanno dheeraad ah lagu sameeyo marxuumka maalinta Talaadada ah.