Muqdisho, 16 December 2025 (Dawan)– Xildhibaan Cabdiraxmaan Cabdishakuur Warsame ayaa sheegay in doorashada lagu wado in ay ka dhacdo magaalada Muqdisho inay u muuqato mid loo adeegsanayo lacag-dhaqid, sida uu ku ogaaday baaritaanno iyo falanqeyn uu muddo sameynayay oo ku saabsan habraaca doorashooyinka iyo kharashaadka ku baxaya.
Isagoo ka hadlayay kulan ay xalay isugu yimaadeen Madasha Samatabixinta mucaaradka iyo qayb ka mid ah bulshada rayidka, oo lagu qabtay Muqdosho, ayuu Cabdiraxmaan Cabdishakuur su’aal geliyay ujeeddada dhabta ah ee dowladda ka leedahay hannaanka doorashooyinka.
“Aniga marka aan baarinaato dheer sameeyay, maxaa sidaan loo sameeya? Doorashada dhan waa lacag dhiqis, bal kawarama arintaas?” ayuu yiri xildhibaanku.
Cabdiraxmaan ayaa sidoo kale eedeyn culus u jeediyay Madaxweynaha Soomaaliya, Xasan Sheekh Maxamuud, isaga oo ku dooday in uu yahay qofka ugu badan ee ka faa’iideysta kharashaadka doorashooyinka. Wuxuu sheegay in madaxweynuhu, sida uu hadalka u dhigay, malaayiin doollar ka helo hannaanka maaliyadeed ee doorashooyinka.
Isagoo tusaale bixinaya, ayuu Cabdiraxmaan Cabdishakuur sheegay in madaxweynuhu guddiga doorashooyinka siiyo lacago ka yar baahida dhabta ah, balse uu qoraallo ahaan ku muujiyo kharash aad uga badan.
