Soomaaliya, 24 Sebtember 2025 – Hal qof ayaa la xaqiijiyay inuu ku dhintay rasaas ay isku weydaarsadeen ciidamada amniga Soomaaliya iyo ciidan taabacsanaa xubnaha mucaaradka Madasha Samatabixinta gudaha magaalada Muqdisho Arbacadii.
Dhacdadan ayaa ka dhacday degmada Wardhiigley intii lagu guda jiray shir jaraa’id oo ay qabteen Booliska Soomaaliya, kaddib markii ciidamo boolis ah lagu qabtay muuqaal ku baahay baraha bulshada oo muujinayay iyagoo jirdilaya nin iyo haweeney ku sugnaa Suuqa Siinaay.
Muuqaalkan oo si weyn loogu wadaagay baraha bulshada ayaa abuuray caro ballaaran, iyadoo shacabka iyo siyaasiyiinta mucaaradka ay cambaareeyeen falka askarta, kuna eedeeyeen inay ku xadgudbeen xuquuqda muwaadiniinta. Caradaas ayaa keentay in saraakiisha booliska gobolka Banaadir qabtaan shir jaraa’id si ay xiisadda u dejinayaan, iyagoo qirtay in qaar ka mid ah saraakiishooda ay ku lug lahaayeen. Afar askari ayaa lagu soo bandhigay shirkii jaraa’id ee ka dhacay degmada Wardhiigley.
“Waxaan hore bulshada ugu balanqaadnay, annaga booliska ahna maxkamad ayaan hor geyn doonaa, wayna wajahaan cadaaladda,” ayuu yiri Mahdi Cumar Muumin, Taliyaha Booliska Gobolka Banaadir.
Mid ka mid ah dhibbanayaasha ayaa sheegay in si xun loo jirdilay, isagoo ku baaqay in askarta loo geeyo maxkamad.
“Anigoo kursi ku fadhiya ayay qoorta iga xireen. Shan nin ayay ahaayeen. Waxaan oggolahay in maxkamad la ii geeyo, wixii maxkamaddu go’aansatana waan aqbalayaa,” ayuu yiri ninka dhibbanaha ah oo magaciisa lagu sheegay Axmed.
Axmed ayaa ka mid ahaa dad dhawaan ka hadlay shir ay qabteen mucaaradka Madasha Samatabixinta halkaas oo dowladdu si weyn loogu dhaliilay.
Intii aan la dhammayn shirka jaraa’id ee Wardhiigley ayaa hoggaamiyeyaasha mucaaradka soo gaareen goobta iyagoo wata ciidamo hubeysan, taas oo dhalisay gacan-ka-hadal isla markaana isu beddeshay israsaaseyn. Dowladda iyo mucaaradka ayaa midba midka kale ku eedeeyay inuu sababay rasaasta.
Mucaaradka ayaa shir jaraa’id kaddib sheegay in dhacdadaasi keentay dhimasho, iyadoo hal qof lagu waramay inuu ku dhintay.
“Waxaan ka tacsineeynayaa, wiilashii maanta ku shahiiday weerarkii gardarrada iyo xaqdaradda huwanaa ay nagu soo qaadeen ciidanka dowladda madaxweyne Xasan oo uu hormuud ka ahaa Macallin Mahdi,” ayuu yiri Ra’iisul Wasaarihii hore Xasan Cali Kheyre.
Mucaaradka ayaa ku tilmaamay ficilladan qayb ka mid ah ol’ole joogto ah oo lagu caburiyo xuquuqda aadanaha, lagu gumaado mucaaradka siyaasadeed, isla markaana lagu cabsi geliyo shacabka.