Ciidamada Jabuuti iyo Faransiiska oo sameeyay dhoolatus militeri

Jabuuti, 27 Janaayo 2026 (Dawan) – Ciidamada Qalabka Sida ee Jabuuti iyo kuwa Faransiiska ee ku sugan dalkaas ayaa sameeyay dhoolatus militari oo wadajir ah, kaas oo ka dhacay deegaanada Koron iyo Grand Bara, iyadoo ujeeddadu ahayd kor u qaadista wada-shaqeynta ciidan iyo xoojinta diyaargarowga howlgal ee labada dhinac.

Dhoolatuska ayaa lagu fuliyay xaalado u dhow kuwa dhabta ah, waxaana lagu tijaabiyay awoodaha dhulka iyo cirka, iyadoo diiradda la saarayay xaalado dagaal oo wadajir ah. Tallaabadan ayaa qeyb ka ah dadaallada lagu xoojinayo is-waafajinta howlgal ee u dhexeysa ciidamada Jabuuti iyo Faransiiska.

Dhoolatuskan waxaa goob joog ka ahaa kormeerayaal ka socday Machadka Faransiiska ee Daraasaadka Sare ee Difaaca (IHEDN), kuwaas oo indha-indheyn ku sameeyay sida ay ciidamada u wada shaqeynayaan iyo heerka diyaar-garowga cutubyada ka qeybgalay.

Sidoo kale, arday ka kala socday hay’ado waxbarasho oo kala duwan, oo ay ka mid yihiin Dugsiga Sare ee gaarka ah ee Jabuuti, Cutubka Dhallinyarada Cirka, fasalka difaaca ee Dugsiga Sare ee Kessel, iyo Machadka Qaranka ee Maamulka Dadweynaha, ayaa ka qeybgalay daawashada bandhigyada, si ay si dhow ugu bartaan howlaha iyo awoodaha ciidamada.

Dhoolatuskan ayaa ku saleysan Heshiiska Iskaashiga Difaaca ee ay Jabuuti iyo Faransiisku kala saxiixdeen xagaagii 2024, kaas oo dib u cusboonaysiiyay joogitaanka militari ee Faransiiska ee dalka muddo 20 sano ah. Heshiiskaasi wuxuu dhigaya in labada ciidan ay si wadajir ah uga shaqeeyaan difaaca dhulka, hawada iyo badda Jabuuti, iyagoo ka qeyb qaadanaya xasilloonida guud ee Geeska Afrika.

Bandhigyada ayaa muujiyay awoodaha hawlgal ee labada ciidan, kuwaas oo si joogto ah loo tijaabiyo, marka la eego xaaladda amni ee isbeddelaysa ee gobolka.