Jabuuti (Dawan Africa) – Ciidanka Booliska Qaranka Jabuuti ayaa sheegay inay burburiyeen shabakad ka kooban shan ruux oo lagu tuhunsan yahay inay ku lug lahaayeen falal dhac, baad iyo boob oo ka dhacay xaafado kala duwan oo magaalada Jabuuti ah, sida ay baahisay Wakaaladda Wararka Jabuuti.
Howlgalka waxaa fuliyay ciidamo ka tirsan guutooyinka 6-aad iyo 7-aad ee Booliska Qaranka, kuwaas oo gacanta ku dhigay shanta eedeysane ee looga shakisan yahay inay ka tirsanaayeen koox abaabulan oo ka howlgeli jirtay xaafadaha Gabode 2, Suuqa Riyaad iyo Arhiba City.
Sida lagu sheegay xogta hordhaca ah ee ciidamada ammaanka, shakhsiyaadka la tuhunsan yahay ayaa bartilmaameedsan jiray dadka ku nool xaafadahaas, iyagoo dhac u geysan jiray, kadibna alaabtii ay ka qaataan u gudbin jiray dad kale oo ka ganacsada waxyaabaha la dhacay.
Intii uu socday howlgalka, ciidamada ayaa gacanta ku dhigay 83 taleefan oo noocyo kala duwan ah, iyo lacag caddaan ah oo dhan 385,000 oo faran Jabuutiyaan ah iyo 240,000 oo birr Itoobiyaan ah. Dhammaan agabkaasi waxaa loo gudbiyay hay’adaha garsoorka si baaritaan dheeraad ah loogu sameeyo.
