Jabuuti (Dawan) – Guddoomiyaha Golaha Shacabka ee Baarlamaanka Federaalka Soomaaliya, Cabdulqaadir Maxamed Nuur (Jaamac), iyo Guddoomiyaha Golaha Qaranka ee Jabuuti, Dileita Mohamed Dileita, ayaa magaalada Jabuuti ku kala saxiixday heshiis is-afgarad oo lagu xoojinayo iskaashiga labada baarlamaan.
Heshiiskan ayaa dhigaya qaab guud oo lagu horumarinayo xiriirka labada gole, iyadoo xoogga la saarayo is-weydaarsiga khibradaha, wadaagista aqoonta iyo dhisidda iskaashi hay'adeed oo dhex mara labada Baarlamaan.
Qodobbada heshiiska waxaa ka mid ah horumarinta hannaanka sharci-dejinta, kobcinta aqoonta iyo xirfadaha shaqaalaha, qabashada tababarrada iyo cilmi-baarista dhinaca sharciga, iyo casriyeynta hababka shaqo ee labada Gole.
Sidoo kale, heshiiska ayaa dhigaya xoojinta wada-shaqaynta guddiyada joogtada ah, adeegsiga tiknoolajiyadda casriga ah, sugidda amniga xogta iyo dhismaha kooxaha saaxiibtinimada baarlamaannada Soomaaliya iyo Jabuuti.