Ciidanka dowladda oo xubno ka tirsan AS ku dilay Gedo

Muqdisho – 6-da Janaayo 2026 (Dawan)- Ciidanka Xoogga Dalka Soomaaliyeed ayaa sheegay in ay dileen shan ka tirsan dagaalyahannada Al-Shabaab, kaddib hawlgal amni oo si qorsheysan loo fuliyay kana dhacay gobolka Gedo ee koonfurta Soomaaliya, sida lagu sheegay war kasoo baxay Wasaaradda Gaashaandhigga.

Hawlgalka ayaa ka dhacay deegaanka Ceel Cilaan, oo qiyaastii 30 kiiloomitir dhanka bari kaga beegan degmada Baardheere, halkaas oo la sheegay in Al-Shabaab ay ku lahayd fariisin ay u adeegsan jirtay abaabulka iyo dhibaateynta dadka deegaanka.

“Intii uu hawlgalku socday, waxaa la dilay shan ka tirsan maleeshiyada Al-Shabaab, waxaana si buuxda loo burburiyay fariisimihii ay ku lahaayeen aagga,” ayaa lagu yiri war-saxaafadeedka Wasaaradda Gaashaandhigga.

Mas’uuliyiinta amniga ayaa sheegay in hawlgalku u dhacay sidii loo qorsheeyay, islamarkaana aanu jirin wax khasaare ah oo soo gaaray ciidamada dowladda. Waxa ay intaa ku dareen in tallaabadan ay qayb ka tahay dadaallada lagu xoojinayo amniga gobollada koonfureed, gaar ahaan meelaha ay kooxdu weli ku leedahay saameynta miyiga.

Gobolka Gedo ayaa weli ka mid ah furimaha kacsan ee ay ka socdaan hawlgallada ka dhanka ah Al-Shabaab, oo xiriir la leh shabakadda Al-Qaacida. Inkasta oo Ciidanka Xoogga Dalka ay sannadkii la soo dhaafay ku guuleysteen in ay kooxda ka saaraan xarumo waaweyn iyo magaalooyin muhiim ah, haddana kooxda ayaa weli dhaqdhaqaaq ku leh deegaannada miyiga ah.

Wasaaradda Gaashaandhigga iyo Taliska Ciidanka Xoogga Dalka ayaa mar kale adkeeyay go’aankooda ku aaddan sii wadista hawlgallada militari, iyagoo xusay in ujeedkoodu yahay in dalka laga xaqiijiyo nabad waarta iyo xasillooni guud.

Hawlgalka ka dhacay Gedo ayaa ku soo beegmaya xilli ay dawladdu sii kordhineyso cadaadiska militari ee lagu wiiqayo awoodda hawlgal iyo midda dhaqaale ee Al-Shabaab, iyadoo lagu doonayo in si buuxda loo hirgeliyo amniga koonfurta iyo bartamaha Soomaaliya.